Kryeministri i Kosovës, Albin Kurti, të mërkurën e kaluar ka njoftuar se qeveria i ka kërkuar Agjencisë Kadastrale të Kosovës të zbatojë vendimin e Gjykatës Kushtetuese të Kosovës të vitit 2016 për tokën e Manastirit të Deçanit.
Kjo ka nxitur reagime të mëdha në opinionin publik në Kosovë.
Por, si e ka parë këtë vendim, njohësi i çështjeve politike, Azim Vllasi.
Ky i fundit në një prononcim për IndeksOnline ka thënë se zbatimi i vendimit të Gjykatës Kushtetuese është në interes shtetëror të Kosovës.
“Kjo ka mbet si kusht i fundit për anëtarësimin e Kosovës në Këshillin e Evropës. Ndërsa K i E është si paradhomë për anëtarësim në NATO e pastaj edhe në BE. Xhamiat, kishat e manastiret janë prona të bashkësive fetare e në shfrytëzim të besimtarëve. Por, toka ku ato janë është e shtetit”, ka thënë Vllasi.
Më tutje, ai thotë se habitet se si kjo temë po shfrytëzohet për kaq shumë konfrontime politike në relacion pozitë-opozitë derisa të gjithë mendojnë se vendimi i Gjykatës Kushtetuese nuk mund të anashkalohet si kusht për rrugëtim drejt integrimeve evropiane.
“Manastiri i Deçanit është pjesë e trashëgimisë kulturore, fetare e historike e Kosovës. Ata 24 hektarë nuk barten në Serbi. Ato 24 hektarë nuk do t’i punojnë popat. Me marrëveshje edhe në vazhdim firma “Apiko” do të prodhoj mjaltë aty”, ka shtuar avokati i njohur.
Ambasadorët e huaj të akredituar në Kosovë e kanë përgëzuar qeverinë e Kosovës për zbatimin e vendimit të Gjykatës Kushtetuese për manastirin e Deçanit.
