Shumëkush e konsideron si një “oligark”, por ajo që dihet me siguri është se Bujar Shabani me kompaninë e tij “Bageri” ka fituar dhjetra miliona euro tenderë nga institucionet e Kosovës, ministria e Infrastrukturës dhe komunat e Kosovës, e së fundi edhe nga komuna e Mitrovicës.
E kjo përveç letrave që janë publike ku kjo kompani fiton vazhdimisht tenderë për rregullimin e rrugëve, shihet edhe nga një video që ka shpërndarë djali i Bujar Shabanit, Leutrimi, ku shpalos pamje të veturave superluksoze kapin vlera marramendëse financiare, shkruan Veriu.info.
Në një video të siguruar nga Veriu.info shihet se Leutrimi publikon pamje të një numri të madh veturash secila më e shtrenjtë se tjetra.
Shumëkush mund të ëndërrojë vetëm njërën nga këto vetura, por djali i Bujar Shabanit duket se ka shumë të tilla.
“Bageri” në pronësi të Bujar Shabanit ka fituar tenderë të shumtë me vlera dhjetëra miliona euro nga ministria e Infrastrukturës dhe së fundi edhe nga komuna e Mitrovicës.
Bujar Shabani njihet edhe për raporte miqësie me zëvendësministrin e Infrastrukturës, Hysen Durmishi, i cili dyshohet se ia mundësoi fitimin e shumë tenderave nga ky institucion.
Madje jo shumë ditë më parë, një fëmijë ra në një pusetë në njërën nga rrugët e Mitrovicës, që ishte lënë pa mbuluar nga kjo kompani që fitoi tenderin nga komuna.
Madje ishte raportuar edhe se si kompania “Bageri” kishte falsifikuar dokumentet e dy gjeodetëve duke i paraqitur sikur punëtorë të tyre për të ftuar tenderë.
Kjo kompani i kishte keqpërdorur të dhënat personale, duke krijuar dy kontrata false me emrat e dy gjeodetëve dhe kishte arritur që të fitojë dy kontrata për asfaltimin e rrugëve.
Një tender e kishte fituar në komunën e Ferizajt me vlerën 2 milionë e 472 mijë euro dhe një në Viti që kapte vlerën e 274 mijë eurove.
