Kryeministri Albin Kurti, sot ka takuar kampionët e Kosovës në basketboll – KB Trepçën, për të cilët ka thënë se janë jo vetëm e tashmja e basketbollit, por edhe ardhmja e këtij sporti në vendin tonë, transmeton VeriuInfo.
KB Trepça i ka dhuruar kryeministrit një fanellë me mbiemrin e tij, të cilën ia ka dorëzuar kryetari i klubit, Vullnet Sefaja.
Postimi i Albin Kurti:
40 fitore, klubit të basketbollit Trepça i sollën katër trofe. Stinori 2023/24 do të mbahet mend si historik për klubin. E për tifozët, të cilët në tribuna shpesh djersiten e përjetojnë më shumë se basketbollistët në parket, është mirënjohja dhe gëzimi më i madh në 40-vjetorin e organizimit të tyre si grupi Torcida.
Trepça këtë stinor u shpall kampion i Kosovës, fitoi Superkupën e Kosovës, Kupën e Kosovës dhe Ligën Unike me Shqipërinë.
Ndërkaq, fakti që ekipi U-12 është po ashtu kampion sivjet dhe fitues i Kupës së Kosovës për këtë grup moshë, tregon që Trepça nuk është vetëm e tashmja por edhe e ardhmja e basketbollit në vend.
