4 maji i 2013-të shënon ditën kur ambienti medial në Kosovë ndryshoi shumë, e sidomos në regjionin e Mitrovicës ku qytetarët informoheshin më drejt e më shumë se çdoherë më parë.
Gazeta Online Veriu.info shënon përvjetorin e nëntë të themelimit me suksese të jashtëzakonshme, duke u renditur si portali i parë në Kosovë sipas statistikave të Facebook-ut.
9 vite më parë Blerim Zhabari e Gazmend Morina themeluan Veriu.info pa përkrahje nga askush, por me guxim dhe gatishmëri për ta nxjerrë të vërtetën dhe plasuar atë në publik.
Bashkëthemeluesi Gazmend Morina ka shkruar se koha kur ata themeluan gazetën online ambienti medial ishte shumë më i vështirë se sa sot, pasi përballeshin me presione nga grupe të interesit e partitë politike.
Morina ka kujtuar rrugëtimin profesional bashkë me Blerim Zhabarin i cili nuk jeton më, por sot e në të ardhmen do të jetë Veriu.info si zë i blerimit.
Sukseset e Veriu.info kanë qenë e të shumta.
Renditjen e Veriu.info si portali i parë në Kosovë për muajt mars dhe prill, pas dy televizioneve Klan Kosova dhe ATV, bashkëthemeluesi Gazmend Morina ia ka dedikuar Blerim Zhabarit, i cili nuk kurseu asgjë nga vetja që gazeta të jetë aty ku gjendet sot.
Postimi i plotë i Morinës:
Sot, është përvjetori i 9-të i gazetës online Veriu.info.
E nisëm me forca vetanake, pra kishim vetëm vullnet për punë dhe kompjuterë. Në fakt nuk kërkuam mbështetjen e askujt, donim të mos kishim hendikepe. Së bashku me Blerim Zhabarin punuam aq fortë, sa që dy vitet e para thuajse punuam pa financa nga 16 orë në ditë në 365 ditë të vitit pa asnjë ditë pushim.
Por e donim shumë Veriun, aq shumë sa e trajtonim si fëmijën tonë.
Më 2013 nuk ishte kjo klimë e lirë e mediave online, sepse ato nuk trajtoheshin seriozisht, pasi që tek të gjithë ishte një përshtypje e madhe se prej medieve të shkruara vetëm gazetat e shtypura duhet trajtuar seriozisht.
Ndër vite trajtuam shumë tema tabu, ku citoheshim jo vetëm nga mediat online e televizionet e Kosovës, por edhe nga mediat ballkanike.
Asokohe presioni ishte i madh, si nga grupet e interesit, përfshirë edhe ato me elemente kriminale, po ashtu kishte presion të madh nga subjektet politike. Me fjalë tjera, sot për secilin medium online është gjithçka më e lehtë.
Kur ishim medium fillestar/vogël na injoronin, kur u fuqizuam nga bënin presion, tash e mira është se të gjithë e respektojnë Veriun. Kjo pasi për momentin Veriu është ndër mediat më të mëdha online në Kosovë.
Kur po shenojmë përvjetorin e 9-të, Veriu.info nga Facebook-u është radhitur gazeta online (portali) numër 1 në Kosovë, përkatësisht media e 3-të pas dy televizioneve Klan Kosova dhe ATV. Kjo radhitje po bëhet për dy muaj (Mars dhe Prill) radhazi nga Facebook.
Këtë sukses ia dedikoj Blerim Zhabarit, që na la fizikisht nga kjo botë vitin e kaluar, me të cilin bashkëthemeluam Veriun si ueb faqe më 4 Maj 2013.
