Zëdhënësi i Qeverisë Perparim Kryeziu në një përgjigje për RTK-në ka replikuar me zëdhënësin e BE-së Peter Stano, i cili tha se “autoritet e Kosovës janë ato që janë përgjegjëse për hetimin dhe më pas ndarjen me neve të raportit të plotë përfundimtar të hetimit. Kjo nuk ka ndodhur ende. Pra, natyrisht nuk mund të vazhdojmë pa pasur rezultate”.
Sipas Kryeziut Qeveria e ka kryer punën e saj duke dorëzuar raport vulominoz në lidhje me sulmin e Banjskës.
“Si Qeveri e Republikës së Kosovës, brenda kompetencave tona, kemi përpiluar një raport 48-faqësh në lidhje me sulmin terrorist dhe paramilitar, të cilin ia kemi dorëzuar Bashkimit Evropian dhe secilit shtet anëtarë qysh vitin e kaluar. Këtë informacion besoj që zëdhënësi Stano duhet ta ketë. Nëse ai në deklaratat e tij të vazhdueshme e ka fjalën për raportin që duhet të përgatitet nga prokuroria e vendit, atëherë kjo është një çështje për të cilën duhet të kërkojmë përgjigje nga vetë ky institucion”, theksoi Kryeziu.
Qeveria vazhdon ta kritikoj Prokurorinë për mosngritjen e aktakuzës, tash kur kanë kaluar 9 muaj nga sulmi në Banjskë, anipse afati ligjor koinsiston deri në 3 vite për përpilim të aktakuzës.
“Për ne, mbetet tejet shqetësuese dhe e pakuptimtë që edhe pas 9 muajve, në njërën anë nuk ka aktakuzë nga prokuroria e vendit për Milan Radoiçiq dhe në anën tjetër bashkësia ndërkombëtare, përfshirë Bashkimin Evropian, nuk ka ndërmarrë masa ndaj Serbisë, përkundër fakteve që dëshmojnë përfshirjen e saj në sulmin e 24 shtatorit të vitit 2023. Rikujtojmë që Radoiçiq vazhdon të mbetet i lirë dhe rrezik potencial i vazhdueshëm për sigurinë dhe paqen në rajon”, tha Kryeziu.
