Seanca e sotme e Kuvendit ka nisur me një mosmarrëveshje mes kryeparlamentarit Glauk Konjufca dhe shefit të grupit parlamentar të AAK-së, Besnik Tahirit, raporton Gazeta Express.
Tahiri e mori fjalën i pari duke shtruar dy pyetje, për të cilat siç duket, nuk ishte marrë vesh me Konjufcën.
“Pyetja e parë është si është e mundshme që për një muaj e gjysmë jemi maltretuar në këtë Kuvend, deputetë e deputete të Kuvendit kanë dalë kanë thënë se komisioni hetimor është në kundërshtim me ligjin për hetim parlamentar. Pyetja ime është shumë e thjeshtë: a është ky komision hetimor në kundërshtim me këtë ligj, dhe nëse është, pse e keni bërë”, tha ai.
“Pyetja e dytë për ju është: A duhet me e marrë shishen me i mëshu qështu, për me e marrë vesh dhe me i sjellë ligjet që i keni? A duhet me i mëshu tavolinës me ju thënë bjereni ligjin e pagave?”, theksoi Tahiri.
Kryetari i Kuvendit, Glauk Konjufca tha se Tahiri e keqpërdori “fort” foltoren e Kuvendit.
“Z. Tahiri, për herë të parë po të them në Kuvend që sapo e keqpërdore fort keq foltoren e Kuvendit. Ja kështu s’bën hiç. Shumë gabim je. Ta dhashë fjalën për tjetër gjë”, tha Konjufca.
“Trego, thuaj po du me folë për komisionin hetimor parlamentar”, shtoi ai, duke i kërkuar t’i respektojë rregullat parlamentare.
Pasi shefi i grupit parlamentar të PDK-së, Abelard Tahiri foli për një debat parlamentar të cilin propozoi ta shtyejnë për shkak të mungesës së kryeministrit, Konjufca i tha Besnik Tahirit ta marrë shembull kolegun nga opozita.
“E ke një shembull se si bëhet mocioni, Z. Tahiri”, tha kryetari i Kuvendit.
“Nuk kam nevojë kryetar me më treegu ti për shembuj. Shembullin ke mujtë me bë mos me u vonu një muaj e gjysmë, e me e thirrë kryesinë e me lëvizë…”, ia ktheu Tahiri.
