Eksponentë të partisë në pushtet kanë dalë kundër qëndrimit të QUINT-it dhe NATO-s, që në këtë fazë nuk mbështesin hapjen e urës së Ibrit në Mitrovicë. Ata insistojnë se ajo do të hapet së shpejti, kurse politikanë nga veriu i vendit kërkojnë nga ndërkombëtarët të arsyetojnë këtë qëndrim. Ndërsa, opozita në anën tjetër kërkon koordinim me aleatët.“Qeveritë tona në konsultim me NATO-n nuk mund ta mbështesin asnjë ndryshim të statusin aktual të urës së Mitrovicës, në këtë kohë”.
Ky është mesazhi i QUINT-it dhe NATO-s, të cilin e transmetoi një ditë më parë, ambasadori amerikan, Jeffrey Hovenier, pas takimit me kryeministrin Albin Kurti.
Megjithatë nga ajo çka po proklamohet prej zyrtarëve të partisë në pushtet, një gjë hapja e plotë e urës pritet të ndodhë shumë shpejt.
Hapja e saj, pavarësisht qëndrimit të aleatëve, sipas deputetit Alban Bajrami, nuk ka se çka të ketë pasoja për Kosovën.
“Autoritetin e plotë dhe të drejtën e ushtrimit të veprimtarisë e ka shteti i Kosovës, ushtarët e KFOR-it dhe në momentin e parë që janë përfunduar të gjitha vlerësimet, ura do të jetë e hapur edhe për qytetarët”, ka thënë Alban Bajrami, Deputet i LVV-së.
Që nga pas lufta, mu në mes të kësaj ure qëndrojnë vazhdimisht si masë sigurie pjesëtarë të KFOR-it, misionit të NATO-s në Kosovë.
E, pa u dakorduar me aleancën ushtarake veriatlantike dhe aleatë të tjerë, sipas deputetit të PDK-së, Xhavit Haliti, nuk duhet të merret asnjë veprim.
Haliti: Ura e Ibrit duhet të hapet për qarkullim në koordinim me aleatët“Nëse veprojmë pa u marrë vesh edhe me EULEX, KFOR dhe QUINT-in është problem, pasi mundet me u vendos KFOR-i në urë dhe mund të ketë probleme mes Policisë së Kosovës dhe qytetarëve të Kosovës në veri”, ka thënë Xhavit Haliti, Deputet i Partisë Demokratike të Kosovës.
Por, asamblisti i Kuvendit Komunal të Mitrovicës Veriore, Betim Osmani thotë se parterët ndërkombëtarë duhet të jenë më të qartë në arsyetimin e kërkesës së tyre që ura të mbetet e mbyllur.
“Nëse këto shtete e shohin si problem atëherë të na tregojnë edhe si qytetarë, po edhe si institucione çfarë dojnë të bëjmë që ura të hapet, nuk është normale që ura të jetë e mbyllur tash e 25 vjet”, ka thënë Betim Osmani, Asamblist në Mitrovicë të Veriut.
SHBA dhe shtetet e QUINT-it insistojnë që çështja e hapjes së urës të diskutohet në dialogun me Serbinë, gjë për të cilën janë kategorikisht kundër Qeveria dhe presidentja Vjosa Osmani.
