Deputeti u Kuvendit të Kosovës Besim Muzaqi së bashku me zëvendësministrin e Bujqësisë, Pylltarisë dhe Zhvillimit Rural Imri Elezi kanë vizituar fermerët e Vushtrrisë ku janë njoftuar për së afërmi me veprimtarinë e tyre, raporton Gazet Online Veriu.info.
Ata kanë vizituar fermerët në Pantinë, Dalak dhe Bukosh.
Njoftimi i plotë:
Zëvendësministri i Bujqësisë, Pylltarisë dhe Zhvillimit Rural, Imri Demelezi së bashku me Deputetin e Kuvendit të Kosovës, Besim Muzaqi, kanë vizituar fermerët e Komunës së Vushtrrisë.
Gjatë kësaj vizite, Zëvendësministri Demelezi është njoftuar nga afër me veprimtarinë bujqësore të fidanishtes “Shaqa” në fshatin Pantinë të Komunës së Vushtrrisë, si dhe me ecurinë e veprimtarive blegtorale tek fermerët Nazmi Osmani nga fshati Dalak dhe Sevdaim Sadiku nga fshati Bukosh i kësaj komune.
“Gjatë kësaj vizite i njoftova ata edhe me programet mbështetëse të këtij viti, përmes të cilave kemi fondin më të lartë të përkrahjes që ka qenë ndonjëherë në krahasim me çdo program të viteve të kaluara. Mjetet e destinuara për bujqësi, pra fondi më i larti që është ndarë ndonjëherë, këtë vit do të përfundojnë te fermerët e vërtetë. Dhe këto ndryshime, sigurisht që janë përkrahje dhe shtysë e madhe që fermerët, përkundër vështirësive që mund të kenë, të vazhdojnë të merren me këto veprimtari dhe të ofrojnë prodhime bujqësore kualitative”, ka thënë Zëvendësministri Demelezi.
Gjatë këtyre vizitave ai është njoftuar edhe me sfidat me të cilat përballen këta fermerë në veprimtaritë e tyre dhe me këtë rast Zëvendësministri Demelezi ka premtuar përkrahje për tejkalimin e sfidave me të cilat përballen fermerët.
#Me fermerët, për fermerët!
