Tashmë kur është caktuar data e zgjedhjeve të reja parlamentare, janë shtuar edhe përplasjet mes pozitës e opozitës.
Një përplasje mes ministrit të Financave, Hekuran Murati dhe ish-ministres Hykmete Bajrami është duke vazhduar këto ditë në rrjetin social Facebook.
Murati dhe Bajrami vazhdimisht po replikojnë me njëri-tjetrin përmes disa postimeve në llogaritë e tyre.
“Sebepi” i kësaj përplasje ishte një postim i ministrit Murati lidhur me përfitimet të Bonove të Diasporës, duke theksuar se investimi në këto bono ka qenë i suksesshëm dhe ka ndihmuar në zhvillimin e vendit.
Ndaj kësaj deklarate reagoi deputetja e LDK-së, Hykmete Bajrami e cila akuzoi ministrin Murati për mashtrime dhe manipulime.
Por përplasja e tyre ka vazhduar. Ministri Murati e quajti Bajramin redaktore e lajmeve.
“Përhajr puna e re si redaktore e lajmeve, Hykmete! Me gjasë kjo duhet të jetë nga ato pakot e marketingut që u ofrohet reklamuesve premium, e titulluar “Shkruajeni vetë lajmin”, ku reklamuesit i ofrohet qasje direkte në portal dhe mund të postojë lajme sa herë që ka nevojë, qoftë edhe të shtunën në ora 23:06”, ka shkruar Murati të shtunën mbrëma.
Ish-ministrja Bajrami i ka reaguar sot me një tjetër postim duke thënë se nuk kalojnë mashtrimet me bono.
“Nuk kalojnë mashtrimet me bono. Prandaj s’keni përgjigje. Ne mungesë të përgjigjes, ministri i dështimeve po ju tregon mediave qysh duhet të publikojnë reagimet e opozitës ku zbërthehen mashtrimet e partisë në pushtet. Tregoni qysh po mashtroni me bono. Jepni përgjegjësi qysh keni mashtru prej bashkimit kombëtar e deri te 160 çerdhet që kurre nuk u ndërtuan”, ka shkruar Bajrami.
