“Lëvizja e Deçanit” ka filluar të shndërrohet në një dukuri shqetësuese. Mbase do të vijë momenti që të kërkojmë edhe ndihmen e shtetit për t’i ndalë instrigat, shpifjet, përçarjet dhe gjitha ato gjëra të cilat eventualisht mund ta rrezikojnë paqen dhe harmoninë shoqërore në vendin tonë. Kështu ka deklaruar Kryetari i Këshillit të Bashkësisë Islame në Mitrovicë, hoxhë Ekrem Avdiu në një intervistë për Veriu TV dhe Veriu.info.
Hoxha që në zyren e tij mbanë flamujt e Kosovës e Shqipërisë, si dhe flamurin me stemën e UÇK-së, thotë se “Lëvizja e Deçanit” është shumë tendencioze, ku bazuar në deklarata akterët e saj nuk e kanë dert ruajtjen e identitetit, sa e kanë dert edhe angazhim sulmin ndaj Islamit.
“Lëvizja e Deçanit sikur ka filluar të shndërrohet në një dukuri, e cila për mua personalisht është shqetësuese për disa arsye. Arsyeja e parë është se promovohet apo trumbetohet te një kthim në rrënjë dhe te ruajtja e identitetit kombëtar, e që njëkohësisht dhe paralelisht sulmohet Islami. Këtu e vërejmë se kjo Lëvizje është shumë tendencioze, ku bazuar në deklarata akterët e saj nuk e kanë dert ruajtjen e identitetit, sa e kanë dert edhe angazhim sulmin ndaj Islamit. Kjo padyshim që rrënon ose e rrezikon harmoninë ndër-fetare që ne shqiptarët e kemi pas ndër shekuj, ku me të jemi mburr dhe konsideroj se vërtetë për neve ka përbërë një vlerë dhe derisa është vlerë ne duhet ta ruajmë me fanatizëm. Çdo gjë që e rrezikon një gjë të tillë, padyshim se do të jetë e dëmshme për neve. Unë nuk insistoj që ndonjëri të përqafoj ose të mbetet në një besim të caktuar për hatër timin ose për hatër të rrethit. Mirëpo, e përqafojmë një besim, e braktis dikush një tjetër ose e përqafon dikush një tjetër, nuk kemi nevojë të armiqësohemi ndërmjet veti”, thotë hoxhë Avdiu për Veriu TV.
Kryetari i KBI në Mitrovicë mendon se përfaqësuesit e feve në Kosovë, si hoxhallarët e priftërinjtë kanë komunikim korrekt ndërmjet vete.
“Ka plotë gjëra në të cilat nuk pajtohemi, janë bindjet fetare që megjithatë i kemi tyë ndryshme, por kjo nuk na pengon që të jemi tolerant dhe të mirëkuptohemi në mes vete. Nuk ka nevojë askush që të na e rrezikoj harmoninë ndër-fetare, e cila ka mbretëruar te ne deri tani. Në përgjithësi edhe institucioni i Bashkësisë Ismale, edhe hoxhallarët, por edhe xhemati i xhamive vërtetë këtë gjë e shohin me shqetësim, për arsye se ne në vazhdimësi përpiqemi që besimin tonë ta aplkikojmë ashtu si na ka hije pa e shqetësu askënd dhe në momentin që ngritet dikush edhe na sulmon ose na godet pikërisht aty ku dhemb më së shumti, atëherë se padyshim se ne ndjehemi të shqetësuar edhe mbase do të vijë momenti që të kërkojmë edhe ndihmen e shtetit për t’i ndalë instrigat, shpifjet, përçarjet dhe gjitha ato gjëra të cilat eventualisht mund ta rrezikojnë paqen dhe harmoninë shoqërore në vendin tonë”, ka thënë hoxhë Ekrem Avdiu për Veriu TV.
