Kontrata aktuale që ka Ministria e Mbrojtjes për furnizim me ushqim për pjesëtarët e FSK-së skadon më 30.09.2024.
Megjithatë, Liridona Gashi, këshilltare politike e ministrit të Mbrojtjes, Ejup Maqedonci, ka thënë se kontrata është aktive edhe sot dhe do të vazhdojnë me shërbimin e njëjtë.
“Nuk do të ndërpritet furnizimi me ushqim i pjesëtarëve”, tha Gashi për rtv21.
Ministria e Mbrojtjes që nga tetori i vitit 2023 e deri në shtator 2024 ka dhënë tre tenderë me procedurë të negociuar pa publikim të njoftimit për kontratë, kompanive të cilat ishin shpallur të pa përgjegjshme nga ana e Organit Shqyrtues të Prokurimit (OSHP), të njohur ndryshe si Gjykata e Tenderëve.
Kontratat e dhëna janë në vlerë miliona euro, ndërsa janë për furnizim me ushqim për nevojat e Forcës së Sigurisë së Kosovës (FSK).
Ndjekja e procedurës së negociuar për furnizimin me ushqim për ushtarët është kritikuar nga opozita, duke e cilësuar si të dyshimtë zgjedhjen e kësaj procedure, ndërsa ministria ka thënë se nevoja ka qenë emergjente dhe për këtë arsye është zgjedhur kjo procedurë.
Arsyetimi që Ministria e Mbrojtjes ka dhënë për hapjen e këtyre tenderëve përmes procedurës së negociuar dhe jo asaj të hapur, ishte se ka qenë e pamundur për ministrinë që brenda afateve kohore të zhvillojë një procedurë të hapur.
Sipas tyre, nevoja urgjente për furnizim me ushqim dhe për shkak që procedura e hapur shkaktonte vonesa, ministria ka zgjedhur një mënyrë më të shpejtë për t’u furnizuar me ushqim për ushtarët e FSK-së.
