Këtë vit, Procesi i Berlinit do të mbahet në Gjermani, më 14 dhe 15 tetor.
Në këtë proces prezent do të jetë edhe Kosova.
Në krye të përfaqësimit për vendin tonë, do të jetë Kryeministri Albin Kurti.Në lidhje me këtë çështje, analisti politik, Gazmir Raci thotë se Procesi i Berlinit ka sjellë shumë rezultate, por që sipas tij nuk i kanë munguar edhe sfidat.
Ai në një prononcim për GazetaBlic, thotë se një ndër sfidat është zbatimi i marrëveshjes nga e kaluara, ajo e Bosnje Hercegovinës, në të cilën Republika Sërpska vazhdon ta bllokojë mos miratimin e marrëveshjes me Kosovën për lirin e lëvizjes me letërnjoftime.“Iniciativa e Berlinit është iniciativa më e qëndrueshme politike dhe ekonomike e shteteve kryesore të Bashkimit Evropian, që është ndërmarrë nga Gjermania dhe Franca për ta integruar përfundimisht Ballkanin Perëndimor në Bashkimin Evropian. Kjo iniciativë ka sjellë shumë rezultate, por ka edhe disa sfida. Një ndër sfidat e saj është edhe zbatimi i marrëveshjeve nga e kaluara, sidomos nga Bosnja dhe Hercegovina sepse siç e dini Republika Sërpska vazhdon ta bllokojë mos miratimin e marrëveshjes me Kosovën për lirinë e lëvizjes me letërnjoftime”, u shpreh Raci.
Ai këtë e quan hipokrizi të serbëve, dhe në këtë rast sipas tij emisari i Gjermanisë për Ballkanin Perëndimor, Manuel Sarrazin, duhet të insistojë te Federata Boshnjake që ta zbatojnë.“Kjo është një hiprokrizi e serbëve në Republikën Sërpska kur dihet fakti se Serbia e ka ratifikuar e Bosnja Hercegovina për shkak të serbëve nuk i ratifikon. Këtu do të duhej që emisari Sarrazin të lunate një rol tash pro-aktiv siç e bëri me rastin e Kosovës, dhe të insistojë te federata boshnjake nga Republika Sërpska ta zbatojë”, theksoi ai.
Më tej, ai shprehet se problemi me CEFTA-në u zgjidh, që sipas tij vendi ynë i kishte vendosur me të drejtë masën e sigurisë së produkteve serbe.Ai theksoi rëndësinë e një qasjeje të balancuar ndaj të dyja palëve, duke mos ndëshkuar Kosovën, e cila nuk ka aleancë tjetër përveç perëndimit.
“Problem u zgjidh. Kosova kishte vendosur me të drejtë masën e sigurisë ndaj produkteve serbe, për shkak se në vazhdimësi Serbia edhe pse nuk e arrinte marrëveshjen me Kosovën e bllokonte rrugëtimin me Kosovën. Serbia vitin e kaluar deponoi lehtë kundër Marrëveshjes së Ohrit dhe marrëveshjes bazike me BE, që nuk do ta zbatojë dhe asnjë ndëshkim nuk e mori, asnjë masë nuk e mori dhe asnjë kritikë të vetme nuk e mori nga Bashkimi Evropian. Mendoj që një fazë e re për komisionin e ri të Bashkimit Evropian, e unë po shpresoj që përfaqësuesja e re e Bashkimit Evropian do të vie me një qasje të balancuar në mes palëve, e jo ta ndëshkojë Kosovën e cila nuk ka aleancë tjetër përpos perëndimit”, përfundoi analisti.Gjithashtu, që tash e tutje, Kosova nuk do të përfaqësohet më nga UNMIK-u në CEFTA, por nga vet zyrtarët shtetëror të vendit.
