Banka Botërore e ka publikuar raportin e ri analitik mbi ecurinë e ekonomisë në gjashtë vendet e Ballkanit Perëndimor.
Raporti analizon zhvillimet e fundit ekonomike dhe perspektivën afatmesme të ekonomisë në Kosovë, ku thuhet se pas një ngadalësimi në vitin 2023, rritja e ekonomisë së Kosovës u përshpejtua në pjesën e parë të vitit 2024, e nxitur kryesisht, sipas raportit, nga kërkesa e brendshme.
“Kjo është mbështetur nga lehtësimi i presionit të çmimeve, rritja e vazhdueshme e kredive, të cilat kanë mbështetur aktivitetin e konsumit dhe investimit. Performanca fiskale mbeti e qëndrueshme, me rritjen e të hyrave që vazhdoi të jetë e fortë. Megjithatë, vendi është përballur me nevojën urgjente për të ndërmarrë reforma që kërkojnë burime të konsiderueshme fiskale”.
“Midis tyre kyç është zbatimi i një strategjie të re energjetike, përmirësimi i sigurisë ujore dhe përshpejtimi i reformave që synojnë forcimin e kapitalit njerëzor dhe konektivitetit. Zhvillimet në tregun e punës janë inkurajuese. Megjithatë, ekziston një nevojë urgjente për të inkurajuar pjesëmarrje më të madhe në fuqinë punëtore, veçanërisht të grave duke i pajisur ato me aftësitë dhe burimet e nevojshme për t’iu përgjigjur nevojave të një tregu pune në zhvillim”, thuhet në raportin e Bankës Botërore, transmeton Klankosova.tv.
Kosova vazhdon të ketë numrin më të madh të të papunëve në rajon. Sipas Bankës Botërore, vetëm 37 për qind e popullsisë së aftë për punë janë të punësuar, teksa sipas raportit, në vitin 2024 rritja e Bruto Produktit Vendor në Kosovë parashihet të përshpejtohet në 3.8 për qind dhe gradualisht, sipas raportit, të arrijë në 4 për qind në periudhën afatmesme, e nxitur nga konsumi, rritja e të ardhurave reale, kreditë dhe shpenzimet publike.
“Stabilizimi ndërkombëtar i çmimeve pritet të ngadalësojë inflacionin e çmimeve të konsumit të brendshëm në 2 për qind në vitin 2024. Megjithatë, presioni për rritjen e pagave mund ta mbajë inflacionin bazë më të lartë”.
“Rritja e presioneve për shpenzime të lidhura me ciklin e ardhshëm zgjedhor, si dhe pasiguria e vazhdueshme gjeopolitike, përfaqësojnë rreziqe për perspektivën e rritjes ekonomike. Në mënyrë të ngjashme, emigracioni i vazhdueshëm paraqet kufizim të rritjes ekonomike. Ndërsa migrimi jashtë vendit ka ngjallur shqetësime për humbjen e kapitalit njerëzor, migrimi mund edhe të mbështesë një shfrytëzim më të mirë të kapitalit njerëzor vendas, me kusht që të ekzistojnë stimujt e duhur”.
“Popullsia në rënie mund të kompensohet nga rritja e pjesëmarrjes së grave në fuqinë punëtore, tani e kufizuar nga mungesa e shërbimeve të kujdesit për fëmijët. Në të njëjtën kohë, ka një sërë ndërhyrjesh që mund të rrisin përfitimet e migrimit për zhvillim në Kosovë”, thuhet në njoftimin e Bankës Botërore.në një vend të Bashkimit Europian në gjysmën e parë të këtij viti.
