Ministri i Mbrojtjes i Shqipërisë, Pirro Vengu, në takimin e ministrave të Mbrojtjes të vendeve anëtare të NATO-s në Bruksel ka folur për rolin që ka KFOR në stabilitetin në rajon. Ai tha gjithashtu se ka bërë thirrje që të ketë një vëmendje të shtuar të NATO-s të ndaj dinamikave hibride dhe aktiviteteve malinje, veçanërisht në veri të Kosovës. “Gjatë fjalës time në këtë sesion, theksova rëndësinë e qasjes gjithëpërfshirëse të parandalimit dhe mbrojtjes, duke kërkuar vëmendje të shtuar për Rajonin e Ballkanit Perëndimor dhe ndava gjithashtu shqetësimin për sfidat e sigurisë me të cilat përballet rajoni. Vlerësova gjithashtu rolin thelbësor të misionit KFOR në sigurimin e stabilitetit në rajon, ndërkohë që bëra thirrje për vëmendje të shtuar ndaj dinamikave hibride dhe aktiviteteve malinje, veçanërisht në veri të Kosovës dhe ndaj zhvillimeve shqetësuese në Bosnje-Hercegovinë”, ka thënë ai pas takimit.
Ai tha se është shumë i rëndësishëm komunikimi i qartë nga Aleanca për të lehtësuar dialogun politik midis Kosovës dhe Serbisë, si dhe nevoja për veprime të shpejta për t’iu përgjigjur çdo ndryshimi në situatën e sigurisë.“Vlerësova në të njëjtën kohë edhe vendimet strategjike të NATO-s për integrimin Euro-Atlantik të rajonit dhe rikonfirmova se roli i KFOR-it është i pazëvendësueshëm për stabilitetin e Ballkanit duke shtuar se Shqipëria, nga janari 2025, do të rrisë praninë e saj në misionin EUFOR-ALTHEA”.
Në ditën e dytë të Ministerialit ai tha se u diskutua mbi zbatimin e vendimeve të marra gjatë Samitit të Uashingtonit, progresin e bërë në forcimin e parandalimit dhe mbrojtjes, si dhe u vlerësuan operacionet dhe misionet aktuale të Aleancës. “Gjatë Ministerialit, konfirmova angazhimin e Qeverisë shqiptare për investimet në krijimin e një infrastrukture solide për Vendin Pritës (“Host Nation”), që përfshin Korridorin VIII me pikë hyrëse në Bazën Detare të Porto Romanos, duke lehtësuar lëvizjen e shpejtë të forcave aleate në krahun juglindor të Aleancës”.
