Në fillim të muajit korrik klubi i futbollit FC Vushtrria kishte prezantuar biznesmenin Shaip Mikullovci si sponsorin kryesor, duke thënë se ky është shpresa e fundit për ta arritur suksesin.
Rreth dy javë me pas FC Vushtrria kishte mbajtur Kuvendin e klubit për të zgjedhur organet drejtuese, përfshirë edhe kryetarin e klubit, mbledhje e cila ishte ndërprerë.
Veriu.info mëson se sot në ora 18:00 FC Vushtrria do të mbajë Kuvendin e klubit ku pritet të bëhet edhe zgjedhja e kryetarit të këtij klubi, zgjedhje e cila pritet të ngjallë debat në opinion kosovar.
Kjo pasi që, siç mëson Veriu.info, kryetar i klubit do të zgjedhet Ish kryetari i Bashkësisë Islame në Vushtrri, Shemsi Rrahimi, i cili në fillim të vitit 2024 kishte dorëzuar detyrën e kryetarit të BIK te Dr. Ejup Haziri.
Veriu.info ka kontaktuar më Shemsi Rrahimin për ta pyetur se a do të jetë kandidat për kryetar të klubit të futbollit FC Vushtrria në Kuvendin e sotëm, ku ai e ka konfirmuar: “Po ashtu. Por si të doni nashta më mirë është me prit të përfundon kuvendi”, duke sugjeruar në mos publikimin e lajmit deri pas Kuvendit të klubit.
Ndërsa, i pyetur se cilat janë arsyet që po e shtyejnë të marrë një pozitë të tillë dhe a ka pasur përvoja të mëhershme në futboll, Shemsi Rrahimi ka zgjedhur heshtjen duke mos kthyr më përgjigje.
Se çka mund t’i jep një klubi futbolli si kryetar një ish kryetar i Bashkësisë Islame të Kosovës, këtë mund ta dijë ndoshta vetëm Shemsi Rrahimi dhe shefi i tij, Shaip Mikullovci, i cili është sponsori kryesor i FC Vushtrria për edicionin futbollistik 2024/25.
Pse pikërisht ish kryetari i BIK në Vushtrrri pritet të zgjedhet kryetar i FC Vushtrria?
Veriu.info mëson se ish kryetari i BIK në Vushtrri, Shemsi Rrahimi, tashmë është punëtor i kompanisë “Emona Group” (Emona ShPK), pronar i së cilës është Shaip Mikullovci që tash është edhe sponsor kryetar i FC Vushtrria.
Kjo vërtetohet përmes një njoftimi të Këshillit të Bashkësisë Islame në Vushtrri të publikuar me 3 tetor 2024, ku Shemsi Rrahimi si përfaqësuesi i Emona Group i dhuron një furgon Këshillit të Bashkësisë Islame në Vushtrri në emër të Shaip Mikullovcit.
Kush është Shemsi Rrahimi?
Siç e cekëm edhe më lartë Shemsi Rrahimi ka qenë për një kohë të gjatë kryetar i BIK në Vushtrri.
Përveç kësaj detyre që e mbante e për të cilën ishte njohur, emri i tij është apostrofuar edhe për një skandal në Medresenë Alaudin, institucion i cili më vonë i kishte mohuar akuzat.
