Kreu i LDK-së, Lumir Abdixhiku ka thënë se përderisa Qeveria Kurti është e fokusuar në të kaluarën dhe ka betejë me të, për vete thotë se ka betejë me të ardhmen, e vetëm për të do të flet.
“Qeveria në këto katër vjet nuk ka qenë në gjendje të bëjë një projekt të vetëm. Këta kanë betejën me të kaluarën, unë kam betejën për të ardhmen, ky është dallimi kryesor. Këta merren me qeveritë e kaluara, unë po tregoj se si bëhet e ardhmja”, u shpreh Abdixhiku në Rubikon të Klan Kosova.
Tutje, kandidati për kryeministër shton se nëse Qeveria aktuale ka mbetur në të kaluarën, të debatojë me ata të kaluarit, por ka një sugjerim për këtë.
“Këta kanë ngecur në të kaluarën, ndërsa unë do të flas për të ardhmen, për të ardhmen që i duhet qytetarit të Kosovës. Le t’i thërrasin të kaluarit, le të bëjnë debat me ta, por unë i sugjeroj ta bëjnë këtë në katedrën e Fakultetit të Historisë, se aty shkruhet historia”, u shpreh Abdixhiku.
