Gjatë hulumtimit për institucionet private shëndetësore dhe respektimin e standardeve ligjore e profesionale në Kosovë, Veriu.info ka siguruar një raport të Inspektoratit Shëndetësor, në të cilin evidentohen gjetje në poliklinikën “Elita Plus” në Prishtinë.
Raporti i Inspektoratit Shëndetësor, i datës 26 janar 2026, tregon se gjatë inspektimit në laboratorin e mikrobiologjisë klinike janë gjetur antibiotikë me afat të skaduar. Inspektorati ka rekomanduar asgjësimin e tyre dhe ka paralajmëruar masa shtesë nëse nuk zbatohen rekomandimet.
Në raport bëhet e ditur se inspektimi ishte realizuar pas një ankese lidhur me mospërputhjen e rezultateve të analizave të urinokulturës në disa laboratorë privatë në Prishtinë.
Antibiotikë të skaduar në laboratorin e mikrobiologjisë
Sipas raportit të siguruar nga Veriu.info, Inspektorati Shëndetësor e ka inspektuar “Elita Plus” më 12 janar 2026, pas ankesës së protokolluar më 12 dhjetor 2025.
Gjatë kontrollit të hapësirave të laboratorit të mikrobiologjisë klinike, inspektorët kanë konstatuar praninë e antibiotikëve me afat të skaduar. Fotografitë e bashkëngjitura në raport paraqesin materiale laboratorike të evidentuara gjatë inspektimit.
Megjithatë, raporti nuk specifikon sasinë e saktë të materialeve të skaduara dhe as nuk konstaton se ato janë përdorur gjatë analizave të pacientëve.
Në mesin e rekomandimeve, Inspektorati ka kërkuar që antibiotikët me afat të skaduar të asgjësohen.
Inspektimi pas ankesës për rezultatet e urinokulturës
Sipas dokumentit të siguruar nga Veriu.info, inspektimi është realizuar për të shqyrtuar ankesën lidhur me mospërputhjen e rezultateve të analizave të urinokulturës ndërmjet disa laboratorëve privatë në Prishtinë.11
Në regjistrin e pacientëve, inspektorët kanë evidentuar një rast me numër protokolli 6, të datës 21 nëntor 2025, në të cilin rezultati i urinokulturës ishte pozitiv për bakterin ‘Proteus spp’.
Në raport përfshihet edhe deklarata me shkrim e specialistes së mikrobiologjisë, Dr. Donjeta Hajdari, e datës 20 janar 2026, lidhur me ankesën për rezultatin e analizës së pacientit.
Sipas deklaratës së saj, mostra ishte përpunuar bazuar në standardet operative për procesimin e urinokulturës. Megjithatë, për shkak të numrit të kufizuar të kolonive bakteriale në pjesën e fundit, në rezultat ishte vendosur një koment për mundësinë e kontaminimit të mostrës.
Specialistja kishte vlerësuar se kjo çështje duhej të shqyrtohej më tej nga mjeku udhëzues për testim.
Raporti i Inspektoratit dokumenton ekzistencën e ankesës dhe gjetjen e antibiotikëve me afat të skaduar, por nuk konstaton se rezultati i analizës ishte i pasaktë dhe as se materialet e skaduara kishin ndikuar në të.
“Elita Plus” mbron rezultatin e analizave
Veriu.info ka marrë edhe qëndimin e “Elita Plus” në lidhje me këtë inspektim të bërë nga inspektorët shëndetësorë dhe gjetjet e evidentuara.
“Ju informojmë se mbetjet me përmbajtje kimike në institucionin tonë grumbullohen dhe dorëzohen periodikisht për asgjësim përmes kompanisë së licencuar për këtë veprimtari. Materialet e evidentuara gjatë inspektimit kanë qenë të veçuara për asgjësim dhe gjatë procesit të grumbullimit dhe tërheqjes së mbetjeve, mund të kenë mbetur jashtë njërit prej cikleve të planifikuara të asgjësimit. Këto materiale tashmë janë asgjësuar. Theksojmë se gjatë inspektimit është konstatuar prania e materialeve me afat të skaduar dhe jo përdorimi i tyre në procesin e analizave laboratorike”, thuhet në përgjigje.
Tutje, “Elita Plus” mbron rezultatin e analizave për të cilat është bërë ankesë, duke thënë se mostra është procesuar sipas procedurave standarde.
“Sa i përket rastit të përmendur të urinokulturës, sqarimet profesionale janë dhënë zyrtarisht pranë Inspektoratit Shëndetësor, ku është sqaruar se mostra është procesuar sipas procedurave standarde operative dhe se në rezultat është përfshirë komenti për shqyrtimin e mundësisë së kontaminimit të mostrës”, kanë deklaruar nga “Elita Plus” për Veriu.info.
Kush është “Elita Plus”?
Sipas raportit, poliklinika private “Elita Plus” në Prishtinë posedon licencën me numër 144/2024, e vlefshme deri më 7 prill 2029.
“Elita Plus” në Agjencinë e Regjistrimit të Bizneseve të Kosovës figuron si kompani e themeluar në vitin 2020, në pronësi të Ajhan Sefedini dhe Erduan Sefedini.
Aktivitet kryesor të biznesit në ARBK ka të regjistruar “aktivitetet e spitaleve”.
Më poshtë keni pamjet e antibiotikëve me afat të skaduar të gjetur në “Elita Plus”;
LEXONI EDHE:
