Ministria e Bujqësisë, Pylltarisë dhe Zhvillimit Rural ka refuzuar të tregojë shpenzimet e “Darkës së Lamës”, që mbrëmë u organizua nga Ministri Faton Peci. Ndonëse ky organizim tradicionalisht i takon Presidencës, organizimin e një darke të tillë mbrëmë, MBRZH e ka arsyetuar si kremtë për “vitin më të begatë në bujqësi”. Presidentja Osmani s’ka marrë pjesë, por i pranishëm ka qenë Kryeministri Kurti.
Në fund të tetorit, Presidentja Vjosa Osmani, ashtu siç tradicionalisht kanë vepruar edhe presidentët para saj, kishte shtruar “Darkën e Lamës”. Sivjet, ajo këtë organizim e kishte bërë në SOS Fshatin.
Pavarësisht se organizimi i kësaj feste është traditë e Presidencës, e nisur nga Presidenti Ibrahim Rugova, Ministri i Bujqësisë, Faton Peci, e ka organizuar mbrëmë një imitim të kësaj darke, që e ka quajtur poashtu si “Darka e Lamës”.
Kryeministri Albin Kurti ka marrë pjesë në këtë darkë, por jo edhe Presidentja.
Nga Ministria e Bujqësisë, Pylltarisë dhe Zhvillimit Rural, i kanë thënë Gazetës Express se në këtë darkë kanë qenë të ftuar të gjithë krerët e shtetit, deputetët e minsitrat.
“Është çështje e agjendës së gjithë secilit se sa e kanë pasur të mundshme pjesëmarrjen”, ka qenë përgjigja e tyre në pyetjen nëse Osmani kishte ftesë për pjesëmarrje.
Por, përgjigje s’kanë kthyer lidhur me koston e organizimit të këtij eventi, që u mbajtë në një nga hotelet e kryeqytetit.
Organizimi i kësaj darke ka ngjallur reagime të shumta, meqë kjo darkë konsiderohet si organizim ekskluziv që bëhet nga Presidenca.
E nga Ministria e Pecit thonë se janë të vetëdijshëm për këtë, por se organizimi është bërë si kremtë për “vitin më të begatë të Kosovës në bujqësi”
“Jemi të vetëdijshëm që Darka e Lamës ka qenë e organizuar në këtë vit si çdo vit tjetër, nën patronatin e Zyrës së Presidentes së Republikës së Kosovës, mirëpo ideja e Ministrit Peci ka qenë që në vitin më të begatë të Kosovës në bujqësi, këtë ta organizojë edhe MBPZhR, si një nismë nacionale që kjo e kremtë të shënohet nga çdo institucion qoftë qendror ose lokal, si dhe në çdo shtëpi të qytetarëve me sofrat e mbushura me prodhimet tona vendore”, thuhet në përgjigjen e Ministrisë.
Ministri Peci, në fjalën e tij para të pranishme, tha se këtë vit kjo darkë është edhe një nderim për trashëgiminë tonë dhe një reflektim mbi përpjekjet për të zhvilluar bujqësinë dhe sigurinë ushqimore të Kosovës.
“Mbrëmjen e sotme shënuam një traditë të lashtë dhe të çmuar; Darkën e Lamës, një moment reflektimi dhe falënderimi ndaj Zotit dhe natyrës për begatinë e vitit që po lëmë pas. Ky ritual ka shërbyer për shekuj me radhë si shprehje mirënjohjeje për frytet e tokës dhe mundin e njerëzve që e kultivojnë atë. Këtë vit, Darka e Lamës është edhe një nderim për trashëgiminë tonë dhe një reflektim mbi përpjekjet për të zhvilluar bujqësinë dhe sigurinë ushqimore të Kosovës. E shënuam në vitin më të begatë për Kosovën, kur siguruam bukën e motmotit falë përkrahjes së Qeverisë, begatisë së Perëndisë, transparencës së Ministrisë dhe djersës së ballit të fermerit meritor”.
Ai përmendi edhe ideatorin e Darkës së Lamës, duke pretenduar se po e vazhdon traditën e tij.
“Kremtimi i saj rikthen në kujtesë amanetin e Dr. Ibrahim Rugovës, që një nga prioritetet e tij ishte sigurimi i bukës së motmotit për qytetarët tanë. Sukseset e bujqësisë janë një prej dëshmive më të forta të përkushtimit tonë për të ardhmen e sigurt dhe të qëndrueshme të Kosovës. Gëzuar për frytet e tokës sonë! Zoti e bekoftë popullin dhe Republikën e Kosovës!”.
Fjalim mbajti edhe Kryeministri Albin Kurti, i cili fjalën e nisi me një falenderim të përzemërt për Ministrin Peci.
“Në këtë dolli të përbashkët, falënderoj veçanërisht fermerët tanë për punën e palodhshme të tyre në rritjen e prodhimit vendor, në vitin që ngadalë por sigurt po e lëmë pas. Ne do të vazhdojmë mbështetjen dhe angazhimin tonë për ta. Sukseset i gëzojmë së bashku, dhe gjithmonë jemi me shpresën që kjo begati të na përcjellë edhe vitin tjetër”, tha Kurti.
“Sivjet kemi një korelacion interesant krahasuar me para katër viteve: edhe sipërfaqja e punuar e tokës edhe Bruto Produkti Vendor janë rritur për 50 për qind. E punojmë tokën më shumë dhe e rrisim ekonominë tonë më lart. Për tokat e mbjella, grurin e korrur, bukën e sofrës, mikpritjen dhe bujarinë që na karakterizon si komb e si shtet. Gëzuar e ta shijoni këtë darkë të shtruar vetëm me produkte vendore”, tha tutje ai.
Pas fotove që u publikuan në rrjete sociale nga kjo darkë, nisën edhe reagimet nga Presidenca.
Këshilltari i Presidentes Osmani, Bekim Kupina, ripublikoi një video të Osmanit të tetorit gjatë organizimit të Darkës së Lamës në SOS fshatin.
“Darka e Lamës 2024 (26 tetor), nën patronatin e Presidentes Vjosa Osmani, sikurse edhe çdo vit tjetër!”, shkroi Kupina krahas videos./GazetaExpress
