Ministri i Financave, Hekuran Murati, përsëri ka “thumbuar”, deputeten e LDK-së, Hykmete Bajramin, duke i thënë të provojë ndonjë drejtim tjetër, pasi sipas tij, Bajramit “nuk po i ecë ekonomia”.
Përmes një postimi në Facebook, Murati ka ri-shpërndarë grafikonin me shkallën e papunësisë dhe të punësuarve, të bazuar në statistikat e ASK-së, shkruan IndeksOnline.
“Po ta kishte lexuar Hykmetja me kohë atë çfarë kam shkruar para mëse 1 muaji, do ta dinte që viti 2019, si vit zgjedhor ka sezonalitet shkaku deklarimit si të punësuar i komisionerëve e vëzhguesve të angazhuar në procesin zgjedhor”, shkroi Murati.
Sipas ministrit të Financave, as kësaj radhë nuk ka demantim e as kundërthënie, vetëm shpërfaqje e njohurive të Bajramit, që sipas tij, “janë të kufizuara”.
Në grafikonin e prezantuar nga Murati, shkalla e papunësisë në tri vitet e fundit ka rënë në 10.9 për qind, ndërkaq janë shtuar mbi 78 mijë vende të reja të punës.
Ky është postimi i plotë i tij:
Hykmetja përsëri çohet vullnetare me u pyet, por përsëri s’ka msu. S’kish qenë keq me provu ndonjë drejtim tjetër, sepse ekonomia nuk po i ecë.
Më poshtë e keni grafikonin që paraqet numrin e të punësuarve nëpër vite, sipas ASK-së.
Po ta kishte lexuar Hykmetja me kohë atë çfarë kam shkruar para mëse 1 muaji, do ta dinte që viti 2019, si vit zgjedhor ka sezonalitet shkaku deklarimit si të punësuar i komisionerëve e vëzhguesve të angazhuar në procesin zgjedhor.
Pra edhe kësaj radhe as nuk ka demantim e as kundërthënie, por vetëm shpërfaqje e njohurive të kufizuara që Hykmetja ka për fushën, sikurse çdoherë tjetër.
