Policia e Shtetit ka reaguar ndaj lajmeve të përhapura në rrjetet sociale, sipas të cilave në radhët e efektivëve të angazhuar për mbarëvajtjen e tubimit të 15 tetorit në Tiranë kishte edhe punonjës policie nga Serbia.
Në reagimin zyrtar, Policia e Shtetit i cilëson këto pretendime si tërësisht të pavërteta dhe dashakeqe, duke theksuar se ato synojnë të shfrytëzojnë ndjenjat nacionaliste për të krijuar një klimë konfliktuale dhe për të dëmtuar besimin e qytetarëve te institucioni.
Sipas Policisë së Shtetit, në tubimin e zhvilluar më 15 tetor, ashtu si në çdo tubim tjetër, janë angazhuar vetëm punonjës të Policisë së Shtetit, të planëzuar në shërbim në bazë të planit të masave.
“Pretendimi për angazhimin e punonjësve të policisë nga Serbia është tërësisht i pavërtetë”, thuhet në reagimin e Policisë së Shtetit.
Policia shpreh keqardhjen për përhapjen e këtyre lajmeve në rrjetet sociale dhe u bën thirrje qytetarëve të tregojnë kujdes ndaj informacioneve të pavërtetuara që qarkullojnë në internet.
