Sot, Shërbimi Korrektues i Kosovës ka pranuar donacion e radhës nga EULEX.Në ceremoninë zyrtare të organizuar për këtë rast, Drejtori i Përgjithshëm i SHKK-së, z. Ismail Dibrani, së bashku me Udhëheqësin e Shtyllës së Monitorimit të EULEX-it, z. Giovanni Galzignato, dhe Shefen e Njësisë Korrektuese të EULEX-it, znj. Anu Melkko, nënshkruan marrëveshjen për pranim-dorëzimin e këtij donacioni.
Donacioni, i konsideruar si më i madhi deri më tani për SHKK-në, përfshin pajisje moderne, duke përfshirë: një veturë, një gjenerator, 293 kompjuterë dhe laptopë, si dhe pajisje të tjera teknologjike, si skanerë, printerë, telefona, radio-lidhje dhe inventarë për zyrë. Në komunikatë për media thuhet se gjatë fjalës së tij, z. Dibrani shprehu falënderime ndaj EULEX-it për këtë mbështetje të jashtëzakonshme, duke theksuar se donacioni do të ndihmojë në përmirësimin e kushteve të punës dhe modernizimin e pajisjeve teknike. “Kjo ndihmë do të kontribuojë në avancimin e standardeve dhe efikasitetit të institucioneve tona korrektuese,” tha ai.
Nga ana tjetër, z. Galzignato dhe znj. Melkko vlerësuan rëndësinë e bashkëpunimit ndërinstitucional, duke theksuar se ky donacion është një pasqyrë e angazhimit të EULEX-it për të mbështetur Shërbimin Korrektues të Kosovës në përmbushjen e standardeve ndërkombëtare.“Ky moment shënon një hap të madh drejt modernizimit dhe forcimit të kapaciteteve të SHKK-së, duke theksuar rolin e rëndësishëm të partnerëve ndërkombëtarë në zhvillimin e institucioneve tona korrektuese”, thuhet tutje, përcjell GazetaBlic.
