Ministri i Bujqësisë, Pylltarisë dhe Zhvillimit Rural, Faton Peci, siç duket ka një person të preferuar, pasi për afro një vit po i përgatit terrenin për ta punësuar në ministrinë e tij.
Sipas raportimeve, Bleron Haxhiu është përzgjedhur në listën e ngushtë të MBPZHR-së si Udhëheqës i Divizionit për Buxhet dhe Financa. Më pas, Haxhiu është emëruar zyrtarisht si drejtues i buxhetit të ministrisë.
Në konkursin përfundimtar për këtë pozitë, të cilin e ka parë Demokracia.com, Haxhiu figuron si fitues me gjithsej 86.2 pikë. Është interesante të theksohet se ai ka grumbulluar vetëm 22.8 pikë në intervistën me gojë, ndërsa dallimin e madh e ka bërë në intervistën me shkrim, ku ka marrë 63.4 pikë.
Para pak ditëve është raportuar se brenda një periudhe prej më pak se 10 muajsh, Bleron Haxhiu, fillimisht punësohet në Agjencinë e Zhvillimit të Bujqësisë me kontratë të jashtëligjshme përmes procedurave të prokurimit edhe pse pozita ishte e rregullt. Kjo gjë është vërtetuar edhe nga Zyra Kombëtare e Auditimit për vitin 2023.
Rreth këtyre punësimeve ishte raportuar më 13 nëntor të këtij viti, ku ministri Peci angazhoi 26 konsulentë përmes prokurimit, që buxhetit të shtetit do i kushtonin afro 500 mijë euro.
Ky ishte hapi i parë që Bleron Haxhiu do të merrte drejt “rrugës” së tij në ministrinë e udhëhequr nga Peci.
I preferuari i Pecit, më pas ia mësyu Zyrës së Prokurimit në ministri. Aty zgjedhet fitues, por sërish me shkelje ligjore të shumta çka edhe e vërteton vendimi i KPMSHCK, ku mori vendim për anulimin e procesit në tërësi.
Bleron Haxhiu vazhdon me hapa të sigurtë, më pas në Agjencinë e Zhvillimit të Bujqësisë si “Zyrtar i lartë i pagesave direkte”, në Departamentin e Pagesave Direkte, zyre kjo e cila menaxhon hiç më pak se 60 milionë euro.
“Apetitet” e të preferuarit të ministrit Peci, nuk kanë të ndalur edhe sot e kësaj dite. Edhe pas tri pozitave të pranuara brenda në më pak se një vit, shumica me shkelje ligjore edhe të konfirmuara, tashmë është emëruar “Udhëheqës për Buxhet dhe Financa” në Ministrinë e Bujqësisë.
Në vazhdimësi është raportuar rreth keqpërdorimeve, dallavereve e skandaleve që e kanë përcjellur ministrinë e udhëhequr nga Faton Peci. /Demokracia.com/
