Gjatë tubimit elektoral në Mitrovicë, kryeministri Albin Kurti deklaroi se “i jep dy zemra Mitrovicës”, por analisti Lirim Mehmetaj e kritikoi ashpër duke theksuar mospjesëmarrjen e Kurtit në luftërat çlirimtare të trojeve shqiptare dhe e akuzoi për shpifje dhe hipokrizi.
Gjatë një tubimi elektoral në Mitrovicë për zgjedhjet e 9 shkurtit, kryeministri Albin Kurti i quajti “zuzarë” liderët opozitarë, “hajna dhe njerëz që e kanë shitur Kosovën”.
Për këto deklarime, analisti Lirim Mehmetaj, në “Debat Plus” i cilësoi fjalët e Kurtit si hipokrite dhe të pandershme.
“Kurti pos tjerash iu tha liderëve të partive politike zuzarë, duke filluar prej themeluesve të UÇK-së e më poshtë. Paramendo me i thënë Kurtit zuzar, bëhet temë, por ai bën, se këta bënë. Ai i quajti njerëz të shitur dhe hajna që ta vjedhin shtëpinë. Por logjika e tyre për mua është e sëmurë, sepse këta e justifikojnë çdo gjë që bëjnë, duke pretenduar se janë padronë të vlerave morale në shoqëri”, ka deklaruar Mehmetaj.
Ai kritikoi edhe qëndrimet e Kurtit për bisedimet e Mimoza – Kusari -Lilës me Milan Radoiçiqin.
“Nëse takohesh me Radoiçiqin, edhe pse ligjërisht nuk është kriminel, është katastrofë dhe vendoset standard. Por, kur komunikohet me të në telefon dhe diskutohet për ligjet e Kosovës dhe caktimin e gjyqtarëve në Kushtetuese nëse ai është kriminel sipas ligjeve të Kosovës dhe atyre amerikane, atëherë është e papranueshme që të mbrohet”, ka shtuar Mehmeti.
Mehmeti përmendi gjithashtu deklaratën e Kurtit në Mitrovicë, ku tha se për atë komunë do të jepte dy zemra.
“Kurti tha i jap dy zemra për Mitrovicën, por jo dy, por një zemër pse nuk e dhe. Në jetën madhore të Kurtit kanë ndodhur tri lufta në trojet shqiptare, UÇK-ja e Kosovës, e Maqedonisë, UÇPMB në Luginë, pse more nuk qëllove në asnjë prej luftërave, kështu që mos rrej e mos shpifë”, ka deklaruar Mehmetaj.
