Më 11 janar 2025 partitë politike kanë nisur fushatat e tyre për zgjedhjet e 9 shkurtit të këtij viti. Gjatë prezantimit të premtimeve e programit të tyre ato nuk kanë kursyer as gjuhën e ashpër karshi njëra-tjetrës.
Ofendimet, akuzat e gjuha nxitëse ka bërë që të reagoj me gjoba nga më të ndryshmet Paneli Zgjedhor për Ankesa dhe Parashtresa(PZAP).
PZAP ditë më parë njoftoi se janë gjobitur tri parti të mëdha politike kjo për shkak të “shkeljes së kodit të mirësjelljes” gjatë fushatës zgjedhore.
Më 20 mijë euro u dënua LDK-ja, me 12 mijë euro AAK dhe me tre mijë euro LVV-ja. Kjo gjobë nuk i mjaftoi partisë në pushtet që të ndalë “shkeljen e kodit të mirësjelljes” pasi u pasua edhe me një dënim tjetër me vlerë të 3 mijë e 500 eurove për përdorim të gjuhës së urrejtjes nga kryetari i VV dhe kryeministri aktual, Albin Kurti.
Pas këtyre gjobave, PZAP të hënën i publikoi edhe vendimet më të reja.
PDK u dënua me 4 mijë euro për shkak të një videoje të publikuar nga kandidatja për deputete e këtij subjekti që e ka realizuar në Kuvend në kundërshtim me Ligjin për Zgjedhje. Njëjtë u dënua edhe një kandidat tjetër i PDK-së, pasi ka realizuar video brenda hapësirave të Odës së Mjekëve.
Me 3 mijë e 500 euro u dënua sërish LDK-ja, derisa dënim tjetër mori edhe koalicioni AAK-NISMA, ku njëri kandidat mori 3 mijë e 500 euro gjobë.
Në një përgjigje për “Front Online”, PZAP ka theksuar se totali i gjobave të shqiptuara ndaj subjekteve politike me vendimet e PZAP-it, deri më tani është 125,000.00 euro.
Violeta Haxholli nga Instituti Demokratik i Kosovës ka kritikuar përdorimin e gjuhës nxitëse dhe të urrejtjes nga partitë politike gjatë fushatës zgjedhore.
Ajo tha se kjo gjuhë, e cila është përdorur edhe në zgjedhjet e kaluara, mund të dëmtojë atmosferën e procesit zgjedhor dhe të nxisë konflikte mes përkrahësve të subjekteve politike.
“Si Demokraci në Veprim (DNV) kemi kritikuar dhe po vazhdojmë të kritikojmë gjuhen nxitëse dhe të urrejtjes që po përdoret në aktivitetet e partive politike garuese edhe në këto në zgjedhje, ashtu si edhe në zgjedhjet e kaluara. Subjektet politike duhet të përmbahen nga përdorimi i gjuhës së tillë, pasi mund të dëmtojnë atmosferën e fushatës zgjedhore dhe procesin zgjedhor në përgjithësi. Kjo sepse gjuha dhe sjelljet e subjekteve politike dhe kandidatëve mund të reflektohen edhe te përkrahësit e tyre dhe të nxisë konflikte në terren”.
Haxholli raportoi se gjatë javës së kaluar, në 25 aktivitete të monitoruara janë vërejtur raste të përdorimit të gjuhës nxitëse, me një intensifikim të tillë veçanërisht nga partia në pushtet.
“Java që lamë pas është karakterizuar me ashpërsim e përkeqësim të gjuhës dhe diskursit të përdorur në fushatë. Në plot 25 aktivitete të monitoruara, janë raportuar raste të përdorimit të gjuhës nxitëse apo të urrejtjes mes partive dhe kandidatëve të tyre – që sipas intensitetit dhe peshës, ka qenë e shprehur sidomos në aktivitetet e partisë në pushtet”.
Ajo theksoi se edhe partitë tjera, si LDK, PDK dhe AAK, kanë përdorur gjuhë të ngjashme.
“Edhe në aktivitetet e partive tjera, përfshirë LDK-në (10 raste), PDK (6 raste) dhe AAK (2 raste), është raportuar për gjuhë të tillë fyese, nxitëse apo të urrejtjes. Kjo gjuhë ka vazhduar edhe gjatë kësaj jave, për raste të cilat DNV do të raportojë të shtunën në konferencën e radhës”.
Ish-kryetari i Komisionit Zgjedhor të Kosovës, Mazllum Baraliu, për “Front Online” ka folur lidhur me intensifikimin e fushatës zgjedhore, duke theksuar se po vihet re një rritje e intensitetit dhe diversitetit të fjalorit që po përdoret nga partitë politike.
Ai tha se disa nga këto komunikime kanë kaluar kufijtë e asaj që është e lejuar në një fushatë zgjedhore dhe janë jashtë rregullave të përcaktuara nga KQZ.
“Nga dita e parë po shihet se po merr një intensitet të shtuar por edhe dinamik edhe diversitet në kuptimin e intensitetit dhe larëshisë së fjalorit, zhargonit që po përdoren, varësisht nga cila parti deri te edhe fjalori i cili është jashtë kufijve të asaj që quhet fushatë zyrtare e lejuar sipas dispozitave të rregullores së KQZ-së, lidhur me fushatën”, u shpreh ai.
Baraliu lavdëroi veprimet e Panelit Zgjedhor për Ankesat dhe Parashtresa (PZAP), duke thënë se ka vepruar në mënyrë efikase dhe të drejtë duke i dënuar partitë për përdorimin e fjalorit të papranueshëm gjatë fushatës.
“PZAP ka vepruar drejtë dhe në mënyrë efikase dhe ashtu duhet të vazhdoj të veproj, duke i dënuar partitë politike për fjalorin që kanë përdorur në këto ditë të fushatës zgjedhore”, deklaroi Baraliu
