Kryeministri i Kosovës, Albin Kurti është zbutur pas betimit të Donald Trumpit si president i SHBA-së dhe kritikave direkte që mori nga emisari i tij, Richard Grenell.
Të martën, pas katër vjetësh kundërshtim dhe propagandë, Kurti e ka cilësuar si të mirë marrëveshjen e Washingtonit të cilën e kishte nënshkruar atëherë kryeministri i Kosovës, Avdullah Hoti.
Mirëpo qëndrimet e Kurtit i kanë ndërruar kritikat direkte nga emisari i Trumpit, Richard Grenell.
Ai ditë më parë ka thënë se Kurti i ka çuar marrëdhëniet mes Kosovës e SHBA-së në pikë të ulët, ndërkaq është përkujdesur që t’i çojë mesazhe edhe Glauk Konjufcës, i cili vetëm pas ardhjes në Trumpit ka thënë se politikat e Barack Obamës dhe Joe Bidenit e kanë vendosur Kosovën në disavantazh.
Grenelli ka thënë se Vetëvendosje katër vitet e fundit i ka çuar duke i bërë komplimente Joe Bidenit dhe duke marrë pjesë në konventat e partisë demokrate.
“Përse nuk u ankuan më herët?”, ka pyetur Grenelli.
Dhe vetëm një javë nga këto kritika të forta nga emisari i Trumpit, Kurti ka ndërruar qëndrim për marrëveshjen e Washingtonit.
Në vitin 2020, Vetëvendosje e Kurtit e kishte cilësuar të dëmshme, të papranueshme dhe të padenjë marrëveshjen e nënshkruar në Zyrën Ovale të Shtëpisë së Bardhë.
“Qeveria e Kosovës sot ka gënjyer sepse njohja reciproke nuk u arrit, ndërkohë që çështjet e brendshme të Kosovës edhe një herë u trajtuan me Serbinë, gjë e cila është e papranueshme”, kishte deklaruar Vetëvendosje më 5 shtator të vitit 2020.
“Në pikën 7 të marrëveshjes thuhet se dy palët, pra Kosova e Serbia, do të punojnë me SHBA-në për studim fizibiliteti për ndarjen e liqenit të Ujmanit, si burim uji e energjie. Kjo pikë konsiston në rikthimin e Serbisë në Kosovë, pra duhet konsideruar si tradhti”, thuhej më tej në komunikatën e VV-së të po asaj date.
Vetëvendosje gjithashtu kishte vënë në dyshim edhe njohjen e Kosovës nga Izraeli.
“Në marrëveshje thuhet se Kosova e Izraeli do të njihen në mënyrë reciproke, e kjo është një lajm shumë i mirë. Por pse duhet që kjo njohje reciproke të lidhet me këtë marrëveshje të keqe, e cila e sjell Serbinë në Kosovë?”, thuhej në komunikatën e 5 shtatorit, një ditë pasi ishte nënshkruar marrëveshja në Washington.
“Po ashtu, marrëveshja tregon se Kosova do të lejojë korridoret hekurudhore e rrugore që Serbia të dalë në detin Adriatik. Nëse as me këtë lëshim Kosova nuk e mori njohjen prej Serbisë, çka tjetër do të duhet të lëshojë? Devijimi i rrugëve prej Mitrovicës në Merdare, dhe përfshirja në një marrëveshje ndërshtetërore i rrugëve të brendshme të Kosovës, krijojnë terren për një projekt të rrezikshëm, siç është ai i ndarjes territoriale të pjesës veriore të vendit. Për më tepër, në marrëveshje merren zotime për rrugë që dalin në Durrës e Shëngjin, mirëpo Shqipëria nuk ka qenë palë në takim e as në marrëveshje”, thuhej më tej.
“Nokauti” i Grenellit
Por pesë vjet më vonë, Trumpi është kthyer përsëri në Shtëpinë e Bardhë dhe Kurti pas “nokautit” që mori nga Grenelli ka vendosur që të ndërrojë qëndrimet.
Në një intervistë për gazetën e njohur spanjolle “El Mundo”, Kurti ka thënë se marrëveshja e arritur gjatë administratës së parë të Trumpit, ishte për të promovuar stabilitetin.
Kështu ka thënë Kurti kur është përgjigjur për atë se si e percepton Kosova ardhjen e Trump në Shtëpi të bardhë dhe për atë se si kjo mund të ndikojë në përkrahjen e Shteteve të Bashkuara ndaj Kosovës.
“Kosova mban një marrëdhënie të fortë bilaterale me Shtetet e Bashkuara, e bazuar në përkushtimin e tyre të vazhdueshëm ndaj sovranitetit tonë dhe integrimit në BE dhe NATO. Gjatë mandatit të Trump, u prioritizuan marrëveshjet ekonomike ndërmjet Kosovës dhe Serbisë për të promovuar stabilitetin, ndërsa administrata Biden ka forcuar institucionet demokratike në Ballkan. Megjithëse këto dallime reflektojnë ndryshime në qasje, nuk besoj se Shtetet e Bashkuara do të ndryshojnë qëndrimin e tyre ndaj Kosovës; ne punojmë ngushtë me Uashingtonin”, ka thënë Kurti.
