Ish-shtruesi i detyrës së drejtorit të Zyrës së Prokurimit në KEK, Ymer Dragusha, i cili akuzohet bashkë me Nagip Krasniqin për korrupsion në këtë ndërmarrje, e ka pranuar fajësinë.
Në marrëveshje për pranim të fajësisë, të cilën e ka publikuar gazetari Lirim Mehmetaj, prokuroria tregon se për cilat vepra Dragusha e ka pranuar fajësinë.
Aty bëhet e ditur se ai e ka pranuar fajësinë për katër vepra penale.
“I pandehuri Ymr Dragusha me shënimet si në shkresat e lëndës, pajtohet që të pranojë fajësinë për katër vepra penale Keqpërdorim i pozitës apo autoritet zyrtar e sanksionuar me nenin 414 par. 2 lidhur me par. 1 të Kodit Nr. 06\L-074 Penal të Republikës së Kosovës“, thuhen në dokumentin e Prokurorisë së Shtetit.
Në këtë marrëveshje tregohet edhe për dënimin e rekomanduar.
Ndër të tjera, aty nga gjykata kërkohet që të mos ekzekutohet menjëherë dënimi ndaj të pandehurit.
“Palët në negocimin e marrëveshjes për pranimin e fajësisë janë pajtuar që gjykatës t`i propozojnë që ndaj të pandehurit të i shqiptohet dënimi me burgim në kohëzgjatje dy vite burgim, mirëpo në bazë të nenit 48, 49 par.2, nenit 71 par. 1.3 dhe nenit 72 të KPRK-së, të urdhërohet që ky dënim të mos ekzekutohet, të jetë i kushtëzuar”, thuhet në marrëveshje.
Më pas, tregohen detyrimet që i pandehur do t`i përmbush të cilat rrjedhin nga marrëveshja për të bashkëpunim.
;
Çka thotë aktakuza për rastin?
Në aktakuzën e dytë ndaj ish-kryeshefit të KEK-ut, Nagip Krasniqi, tregohet detaje se për çka akuzohet ish-shefi i kësaj kompanie dhe Ymer Dragushën, si ushtrues detyre i drejtorit të Zyrës së Prokurimit.
Sipas aktakuzës, e cila është publikuar në media, të njëjtit akuzohen nga nëntori i vitit 2022 e deri në fund të janarit të vitit 2023 se kanë keqpërdorur detyrën e tyre zyrtare.
Në këtë mënyrë, Krasniqi dhe Dragusha i kanë tejkaluar kompetencat që i kanë pasur.
Duke i tejkaluar këto kompetenca, sipas aktakuzës, të pandehurit i kanë mundësuar përfitime operatorit ekonomik “Litëin S.A”, në rastin e aktivitetit të prokurimit lidhur me “Riparimin kapital të kalldasë së bllokut A5”.
Ndër të tjera, në aktakuzë thuhet se Krasniqi në zyrën e tij i kishte kërkuar Dragusha të fillohet procedura e negociuar për tenderin, i cili parashihte riparimin e kalldasë së bllokut A5.
Një e tillë ishte bërë pavarësisht se Dragusha i kishte treguar Krasniqit se një veprim i tillë nuk ishte në përputhje me Ligjin për Prokurimin Publik.
