Mbrëmë u raportua për një rast të kërcënimit me të cilin u përballën zyrtarët policorë në rrugën ”Bill Clinton” në Pejë, pas shqiptimit të një gjobë për parking ilegal. I dyshuari që kërcënoi Policinë, u dënua pasi kishte parkuar automjetin e tij në trotuar.
Gjoba që mori e mllefosi atë dhe iu drejtuar zyrtarit policor me fjalë kërcënuese. Por kjo i kushtoi, pasi me vendim të Prokurori i njëjti u dërgua në mbajtje.
Burimet brenda Prokurorisë thonë se i dyshuari për kanosjen e policit, ndaj të cilit është nxjerrë aktvendim për ndalim prej 48 orësh është Visar Lajqi.
40-vjeçari dyshohet se iu drejtua zyrtarit policor me fjalët “me bo me ta ngjit, ta nxjerri gërrklanin dhe të mbys krejt”, duke e akuzuar se me qëllim po bëhen patrullime në biznesin e tij, në mënyrë që ta dëmtojnë.
“Pse s’po shkoni bre t’i dënoni veturat që parkohen te Kelmendit, ju s’keni bo** që të shkoni as në Mitrovicë, po me qëllim po vini të më dëmtoni”, ishin fjalë e të dyshuarit, thonë burimet e njëjta.
Përballë kësaj situate, Policia ka kërkuar njësi shtesë, me ç’rast i dyshuari është vënë nën kontroll dhe është arrestuar.
Pas shoqërimit në stacion policor, Prokurori i Shtetit ka urdhëruar ndalimin e tij prej 48 orësh, nën dyshimet për kryerjen e veprës penale “kanosje ndaj personit zyrtar”.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
