Në mars të vitit 2021 Lumir Abdixhiku ishte zgjedhur kryetar i LDK-së, pak ditë pasi që Isa Mustafa kishtë dhënë dorëheqje nga pozita e drejtuesit të kësaj partie. Dorëheqja e Isa Mustafës kishte ardhur pas rezultatit të dobët të arritur nga LDK-ja në zgjedhjet për Kuvendin e Kosovës të mbajtur më 14 shkurt 2021, ku kjo parti kishte marrë vetëm 12.7% nga 24.54% sa kishte në zgjedhjet e mbajtur në tetor të vitit 2019.
Me të marrë pozitën e kryetarit të LDK-së, Lumir Abdixhiku kishte nisur ndryshime strukturore në parti, të cilat i quante si reforma për ringritjen e LDK-së.
Nga këto reforma kishin pësuar Isa Mustafa, Avdullah Hoti, Agim Veliu e shumë figura që njiheshin si të afërta më Isa Mustafën e Agim Veliut, dy figurat kyqe të LDK-së për shumë vite.
Në zgjedhjet vitit 2021 bartës i listës ishte Avdullah Hoti që mbante numrin 1, numër 4 ishte Agim Veliut, përderisa Lumir Abdixhiku ishte renditur me numër 11.
Për zgjedhjet që do të mbahen nesër, bartës i listës është Lumir Abdixhiku, Agim Veliu është lënë jashtë listës edhe pse në zgjedhjet e kaluara ishte deputeti i shtatë më i votuar, përderisa Avdullah Hoti tash mban numrin 13.
Me këto dhe të tjera veprime, Lumir Abdixhiku i ka margjinalizuar totalisht figurat e LDK-së që për shumë vite njiheshin si njerëzit më të afërt të Isa Mustafës.
Të gjendur përball kësaj situate dhe nga frika se do ta humbin totalisht ndikimin pas zgjedhjeve të 9 shkurtit, disa figura që njihen si ‘krahu’ i Isa Mustafës në LDK nuk kanë qendruar duarkryq, por edhe ata kanë bërë lëvizjen e tyre.
Burime të Veriu.info nga LDK-ja bëjnë të ditur se ‘krahu’ i Isa Mustafës brenda partisë ka formuar 10-shen e tyre të kandidatëve që presin të votohet nesër, me synimin që nga zgjedhjet e 9 shkurtit të zgjidhen 10 deputet në grupin parlamentar të LDK-së që i japin llogari Isa Mustafës.
Siç mëson Veriu.info, personi kyq i kësaj liste që do të votohet është Avdullah Hoti, por edhe disa kandidatë tjerë, me theks të veçantë nga Prishtina, Prizreni dhe rajoni i Dukagjinit.
Se a do të arrij kjo 10-she e përkrahur nga mbëshetësin e Isa Mustafës të futet në Kuvendin e Kosovës, mbetet të shihet pas numërimit të votave që dalin nga zgjedhjet e nesërme.
Por nëse kjo 10-she e kandidatëve arrin të fitoj mandatet e deputetëve, atëherë pritet që gati gjysmën e grupit parlamentar të LDK-së ta kontrolloj Isa Mustafa./Veriu.info
