Gjatë hulumtimit për institucionet shëndetësore private që operojnë në mënyrë të kundërligjshme, me shërbime të palicencuara dhe staf ilegal (të palicencuar), kemi hasur edhe në një klinikë në Lipjan që është gjobitur nga Inspektorati Shëndetësor.
Veriu.info ka siguruar një vendim të Inspektoratit Shëndetësor të Ministrisë së Shëndetësisë, me të cilin institucioni privat shëndetësor “Target Clinic” me themelues, Dr. Burim Mahmuti është gjobitur me 2 mijë euro për shkelje të Ligjit për Shëndetësi.
Në arsyetimin e vendimit të Inspektoratit Shëndetësor për gjobitjen “Target Clinic” të siguruar nga Veriu.info, thuhet se qëllimi i inspektimit ishte verifikimi i vendimit me nr. të protokollit 05-293 për pezullimin e veprimtarisë shëndetësore të pediatrisë, pas kërkesës në sistemin online të DLA nga Burim Mahmuti me datë 06.01.2026.
Në vendim bëhet e ditur se gjatë inspektimit janë gjetur fakte se janë ofruar shërbime shëndetësore të pediatrisë edhe pas pezullimit të veprimtarisë shëndetësore të pediatrisë.
“U gjetën pacientë të evidentuar në protokolin e pacientëve si dhe u gjetën raporte mjekësore të pacientit RM të datës 31.01.2026 dhe pacientes A.A të datës 02.02.2026, të cilat nuk ishin evidentuar në protokolin e pacientëve. Këto shërbime ofroheshin nga Dr. Behar Mahmuti – Doktor i Mjekësisë me licencë valide deri më datë 23.10.2029, i cili nuk ishte i regjistruar në DLA si staf shëndetësor, por vetëm si drejtor i institucionit”, thuhet në vendim.
Sipas Inspektoratit Shëndetësor, ishte konstatuar se “Target Clinic” në Lipjan nuk e ka respektuar ligjin, duke mos lajmëruar shërbimin që e ofron, si dhe personelin shëndetësor në bazë të Nenit 94 paragrafi 1 nën paragrafi 1.2.
“IPSH “Target Clinic” me themelues Dr. Burim Mahmuti, Rruga “Mbretërit Zog pn”, Lipjan ka bërë shkelje të dispozitave të Ligjit për Shëndetësi 04/L-125 Neni 94 i Ligjit Nr. 04/L-125 i plotësuar ndryshuar me nenin 3 të paragrafit 1 të nenit 94 i Ligji nr. 08/L-043 për ndryshimin dhe plotësimin e Ligjit nr. 04/L-125 për Shëndetësi paragrafi 1.2 ushtron veprimtarinë pa përmbushur kushtet ligjore të nenit 40 dhe 42 të këtij ligji. Inspektorata Shëndetësore në pajtim me dispozitat ligjore vendosi si në dispozitiv të këtij vendimi”, theksohet në vendimin e siguruar nga Veriu.info.
Veriu.info ka tentuar të marrë një qëndrim nga “Target Clinic” për këtë vendim të Inspektoratit Shëndetësor, por deri në momentin e publikimit të artikullit nuk kemi pranuar përgjigje për pyetjet e dërguara.
