“Kurse intenzive, bashkim familjar, kurse individuale”. Këto janë disa nga ofertat që një kurs i gjuhës gjermane i ka të vendosura në ballë të objektit. Por, nuk është vetëm i tillë.
Për të kaluar testimin dhe certifikimin e gjuhës gjermane disa persona zgjedhin një kurs, i cili i josh me rrugë më të shkurta dhe të lehta. Disa nga kandidatët që kanë zgjedhur si adresë Qendrën për gjuhë gjermane “Edi” në Skenderaj, në mënyrë që të kalojnë nivelin e parë të gjuhës gjermane (A1) me ndihma të formave të ndryshme, paguajnë për këtë shërbim deri në 1500 euro.
Për të kuptuar tërë procesin dhe ndihmat që ofron ky kurs në mënyrë që të kalohet më lehtë provimi i gjuhës gjermane për certifikim në Institutin “Gete” (Goeth), ekipi i “Betimit për Drejtësi” është paraqitur si kandidatë, që dëshirojnë të shkojnë në Gjermani për bashkim familjar.
Abedin Shatraj, bashkëshorti i Suzana Shatraj, në emër të së cilës figuron i regjistruar biznesi, në takimin e parë të zhvilluar me të tregon për procedurat.
Në takimin e parë gazetarja e paraqitur si kandidate, e pyet Shatrajn se a duhet të vijohet mësimi edhe me pagesën prej 1500 euro.
Abedin Shatraj: Duhet me ardhë në kurs, edhe me atë çmim duhet me ardhë në kurs.
Gazetarja: E qysh është procedura, qysh shkon?
Abedin Shatraj: Këqyre ne e kemi me të rregullt mos me të ndihmu është fjala kurgjë, po me i mësu senet ti duhet me ardhë tre muj ditë. E tre muaj ditë e ki ka 130 euro mujoren. Në muajin e tretë normal tana shkollat me shënime direkt çka bijnë në provim nuk merret kërkush. Për shembull po e zë afërsisht qysh punohet si me letra, si me formularë, si me ato sene komplet, ai ti qet rend i mëson kalon, si mëson bjen prej provimi. Mënyra tjetër, gramatika që është pak si ma problem e kapshme, gramatikën dy libra gramatikë që duhet me ardhë dy muaj ditë për to, ato i hjekum na. Shkojna veç me parapërgatitje të provimit, do të thotë çka do që mëson te ne në klasë, origjinal i ki qato sene mrena në provim.
Tutje, Shatraj pyetet se a i dinë paraprakisht shënimet apo testet e provimit.
Abedin Shatraj: Mos me i ditë na nuk mujmë me kry punë. Kështu që, shënimet çka të bijnë prej provimi, i ki te na në kurs. Gramatika të hjeket komplet, diku 70% të testit hjeket komplet, 30% të testit çka po mbetë qekjo pjesa çka kemi me të ushtru ty qare nuk ki pa i mësu se edhe kur shkon në ambasadë kanë me të pytë, kanë me të testu nëse ti nuk din. Po qato sene duhesh pa qare me i mësu.
Në bisedë e sipër, Shatraj tregon një ndihmesë tjetër që ofrojnë si kurs në testime për çertifikim në Institutin Gete.
Sipas të dhënave të Ambasadës Gjermane në Prishtinë, ky institut, është njëri nga pesë që njihen çertifikatat gjuhësore gjatë aplikimit për vizë për qëndrim më shumë se 90 ditë, në këtë ambasadë.
Abedin Shatraj: Qeto çka t’i mësojsh, qato të bijnë, qato të bijnë në provim. Është tani edhe shtesë, por ajo shtesa e ndihmës krejt po varet pak ku po na bijnë ndihmsat se mujmë edhe diçka hala ma shumë me bë, por ajo le të jetë në kohën e fundit çka mujna me bë. Se me të premtu unë ty që e ki plus ndihmësin, në vend se me të ndihmu, bënë vaki ndihmësi, ndihmësi është gjithqysh, po bënë vaki që ta qesin mbrapa krejt, po ka kësi raste e tani kur ta qesin mbrapa. Po na të bëjmë gati pa ndihmës, po kjo është ekstra tani masanej se kam unë nxënës që as shqip s’dijnë me shkru a po kupton, ajo është ekstra. Po, për të duhemi me lënë në fund prapë. Me rëndësi është që çka të punojmë na, kemi me i kry senet në provim.
Gazetarja: Sa po i bjen sa kom me ardhë unë këtu rregullisht, qysh shkon?
Abedin Shatraj: Me marrëveshje e kemi një muaj ditë me ardhë, por nuk je e kushtëzune gjithqysh 1 muaj me ardhë. Bile bash një të Shalës së Mitrovicës për tre ditë e ka kry, qeto sene çka t’i qesim na, qeto sene që i mëson ti për tre ditë, mo mos hajde, pjesa jonë është e kryne edhe u kry. Tash s’po di kush të ka informu me ardhë te na veç me siguri dikush e ka kry këtu.
Me çmimin 1500 euro, Shatraj tregon se përfshihen të gjitha ndihmesat.
“Qysh të ka thënë ai person, qashtu kryhet. Edhe prej ditës së parë deri te qitsh vizën në pasosh, tana senet që të lypen në Kosovë, deri në Ambasadë, tana përfshihen me qetë punën tonë”, thotë ai”.
Për më shumë, ndiqeni hulumtimin “Pa mbikëqyrje, me ryshfet: Skema e kurseve të gjuhës gjermane”, i cili transmetohet në Betimi për Drejtësi, KTV dhe TVArta/BetimipërDrejtësi
