Një konflikt verbal mes të rinjve ka përfunduar me të plagosur, të martën në Ferizaj. Përleshja, motivet e së cilës ende nuk dihen ka eskaluar në përdorimin e thikës, me ç’rast dy të mitur kanë mbetur të therur.
Burimet e Sinjalit brenda QKUK-së kanë njoftuar se dy të miturit e përfshirë në rrahje janë dërguar në këtë qendër për shkak të gjendjes së rëndë.
Përveç tyre, Sinjali mëson se edhe i dyshuari kryesor është dërguar për trajtim mjekësor, e më pas është shoqëruar në stacion policor, ku ka dhënë deklaratë.
Sipas informatave të para, i dyshuari kryesor fillimisht ishte sulmuar nga të miturit me boksa të hekurit, e më pas në vetëmbrojtje ka nxjerrë një thikë, me të cilën i ka goditur dy prej tyre.
Sinjali mëson se gjendja shëndetësore e njërit nga të miturit që po trajtohet në QKUK është mjaft e rëndë.
Ndërkohë në vendin e ngjarjes kanë dalë të gjitha njësitë relevante, ku është bërë ekzaminimi dhe janë mbledhur informacione për rastin.
Me urdhër të Prokurorit të Shtetit, hetimet kanë nisur për vrasje në tentativë.
