Sot në mbledhjen e KQZ-së derisa u diskutua për rekomandimin e Sekretariatit për vlerësimin e votave me postë që u shpallën të pavlefshme, anëtari i KQZ-së nga VV, Alban Krasniqi, i ka sulmuar mediat.
Ai iu drejtua anëtarëve tjerë të KQZ-së që vijnë nga PDK e AAK duke iu thënë “mediumet e juaja që po i paguani”.
“E ki një nen tjetër ku t’i përcakton format apo cilat janë fletëvotimet e pavlefshme dhe asnjëri rast për të cilin PZAP ka kthy nuk bjen në domenin e fletëvotimeve të pavlefshme dhe keni qenë aty tërë kohën kur kemi qenë ne, keni qenë edhe ju por që kurrë ato mediume e juaja që i paguani, qysh i paguani, nuk iu kanë qit juve që çka jeni tu bë dhe tek jeni tu bë, por natyrisht ju kanë vërsulë dy kolegëve tuaj dhe me lejen tuaj dhe me videot që i kanë siguru vëzhguesit tuaj, se për qat mision kanë qenë, me prish procesin, jo me rregullu”, tha ai.
Më pas fjalën e mori Sami Kurteshi, i cili përveç mediave i sulmoi edhe OJQ-të.
“Unë jam një prej atyre që kam qenë aktiv në QNR edhe po e kam dhënë mendimin tim pikërisht në lidhje me këto fletëvotime. Natyrisht që përputhet gjuha e disa OJQ-ve që janë paterica të partive politike dhe disa mediave, po ndërhyn në proces. Ngritja e një çështje nuk është ndërhyrje në proces, është e drejtë e shprehjes së lirë dhe e reagimit sa herë mu ma merr mendja me reagu në raste kur unë mendoj ndryshe”, tha Kurteshi.
