Komisioni Qendror i Zgjedhjeve ka njoftuar se deri në orën 16:00 janë rinumëruar 36 nga 50 vendvotime pas vendimit të së hënës.
Zëdhënësi i KQZ-së, Valmir Elezi ka treguar se sa vendvotime janë rinumëruar në Vushtrri.
“Sipas të dhënave, deri të martën në orën 16:00, janë rinumëruar 33 nga 35 vendvotimet nga komuna e Vushtrrisë, ndërkaq nga 15 vendvotimet e komunave tjera janë rinumëruar 3 sosh”, ka thënë Elezi.
Në mbledhjen e mbajtur të hënën, KQZ kishte miratuar dy rekomandime të prezantuara nga anëtari i PDK-së, Arianit Elshani.
Rekomandimi i parë ishte për rinumërimin e 15 vendvotimeve për shkak se ka mospërputhje të numrit të nënshkrimeve në listën e votuesve me numrin e fletëvotimeve brenda në kutitë e votimit.
Ndërsa rekomandimi i dytë ishte për rinumërimin e votave në 35 vendvotime për shkak se ekzistojnë mospërputhje të rezultateve të kandidatëve të LDK-së në komunën e Vushtrrisë.
