Presidenti i Republikës Srpska, Milorad Dodik, në një konferencë të mbajtur sot për shtyp në Banja Lukë, pas festimit të ditëlindjes së tij të 66-të i dërgoi një mesazh “kërcënues” komandantit të EUFOR-it, Florin-Marian Barbo, i cili vjen nga Rumania.
“Ne shohim se këta, ky komandanti nga Rumania, po përpiqen të forcojnë karrierën e tyre me manifestime dhe kërcënime të ndryshme. Ndoshta ka parë një mundësi për të shkruar diçka të suksesshme në biografinë e tij. Tanket janë të kota. Nuk mendoj se ai ka përgjigje për topat në kokë dhe disa gjëra të tjera. Nuk do t’i rekomandoja as ta kontrollonte sepse topat serbë janë shumë më të vështirë se disa të tjerë”, tha ai.
“Ai lirisht mund ta varë macen nga bishti me kërcënimet e tij, pavarësisht se është komandant i EUFOR-it”, vazhdoi tutje Dodik.
Dodik, u shpreh sot se EUFOR mund të sillte deri në 10,000 ushtarë, dhe se ata nuk kanë asnjë problem me këtë, duke i thënë gjeneralit rumun të qëndrojë në mandatin e tij duke i bërë me dije se serbët nuk tolerojnë një pushtues.
“Nëse nuk ju mjaftojnë 1000, sillni 10.000 njerëz. Ne nuk kemi problem. Por qëndroni në mandatin tuaj. Asnjë serb nuk do të qëllojë mbi ju dhe nuk do të bëjë asgjë, por serbët nuk janë të gatshëm të tolerojnë një pushtues. Dhe ky gjeneral rumun që po e falsifikon është një provë klasike e pushtimit. Ndoshta ne do ta shpallim forcën tonë”.
Tutje, Dodik, përmendi takimin e ardhshëm me Rusinë, duke theksuar se nuk e kanë problem të forcojnë praninë e tyre.
“Këto ditë do të takohem me përfaqësuesit e Federatës Ruse në nivelin më të lartë dhe ndryshe nga të gjitha vitet e mëparshme kur kërkova që Altea të mbetet, tani do t’u kërkoj rusëve të vënë veton dhe të mos lejojnë një strukturë subversive që shpërdoron mandatin e OKB-së dhe na kërcënon ne serbët të qëndrojë. Meqë ra fjala, ne nuk e kemi aspak problem që të forcojmë praninë e tyre dhe të veprojmë në përputhje me mandatin”.
