Kandidati i PDK-së për kryeministër në zgjedhjet e 9 shkurtit, Bedri Hamza, ka komentuar mënyrën se si ish-presidenti Hashim Thaçi u lejua të vizitonte babanë e tij të sëmurë në QKUK.
Ai e cilësoi të panevojshme qasjen e Gjykatës Speciale në raport me kërkesat për vizitë humane, sidomos kur bëhej fjalë për babain e vet, Haxhiun.
“Me zotin Thaçi, me presidentin Thaçi përveç relacioneve të punës kam edhe raporte personale dhe familjare. Sigurisht se këto janë edhe emocione të përziera, për shkak se anën pozitive të kësaj vizite e shoh në faktin që pas shumë kërkesave, iu ka jep e drejta për vizituar babin e tij të sëmurë në QKUK”.
”Edhe unë e kam vizituar bacin Haxhi, e kam mik të mirë. Dhe kjo është ajo pjesa e bukur. Ndërsa ana tjetër paraqet diçka total diçka të panevojshme”.
”Janë ato pamje. Janë gjithë këto vonesa me iu njoftë një e drejtë njerëzore që me vizitu prindin e tij, jo në gjende të mirë shëndetësore”.
”Jam i bindur që përtej dallimeve politike, kjo pamje kjo mënyrë totalisht e panevojshme dhe paarsyeshme nuk janë ato të duhurat që i nevojiten këtij rasti dhe nuk i meriton as presidenti e as Kosova”, ka thënë Hamza në Debat Plus.
