Gjykata e Apelit ka vërtetuar dënimin me një vit burgim për Kujtim Bekajn, zyrtar i Gjendjes Civile në Skenderaj, i akuzuar për korrupsion.
Me 24 janar, Gjykata Themelore në Mitrovicë kishte shpallur fajtor Bekajn, duke u dënuar me një vit burgim efektiv, si dhe dënimi plotësues – ndalimi i ushtrimit të funksioneve publike në administratën publike ose në shërbimin publik në kohëzgjatje prej dy vite.
Kujtim Bekaj akuzohet se gjatë viteve 2014-2017 ka regjistruar martesa pa përmbushur kushtet ligjore, ka falsifikuar të dhëna në dokumente zyrtare dhe i ka vërtetuar ato me nënshkrim dhe vulë zyrtare.
Ndërkohë, Gjykata e Apelit ka refuzuar si të pabazuar ankesën e mbrojtësit të akuzuarit Bekaj, avokatit Sylejman Klinaku, raporton “Betimi për Drejtësi”.
“Refuzohet si e pabazuar ankesa e mbrojtësit të akuzuarit K. B , Av. Sylejman Klinaku, ndërsa aktgjykimi i Gjykatës Themelore në Mitrovicë, Departamenti për Krime të Rënda, P.nr.4/2020, i datës 20.03.2024, Vërtetohet” thuhet në dispozitivin e Apelit.
Kundër aktgjykimit të Themelores është ushtruar ankesë nga avokati Klinaku, sa i përketë vendimit mbi sanksionin penal duke kërkuar zbutje të dënimit si dhe në të cilën ka kërkuar që dënimi plotësues të ndryshohet.
Sipas Klinakut, gjykata e shkallës së parë nuk i ka marrë parasysh rrethanat personale të të akuzuarit, pasi që i njejti është mbajtës i familjes dhe se gjendja e tij ekonomike është e dobët.
Kurse, Prokuroria ka kërkuar që ankesa të refuzohet dhe që aktgjykimi i ankimuar të vërtetohet.
Sipas Apelit, gjykata themelore ka vlerësuar drejtë rrethanat rënduese pasi që i akuzuari ka vepruar me dashje direkte.
“Të gjitha këto rrethana sipas vlerësimit të kolegjit penal të kësaj gjykate japin bazë të mjaftueshme që arsyetojnë shqiptimin e dënimit nga gjykata e shkallës së parë si në dispozitiv të aktgjykimit të ankimuar”, thuhet në vendimin e Apelit.
Tutje, gjykata e shkallës së dytë vlerëson se dënimi i shqiptuar është në harmoni me intensitetin e rrezikshmërisë shoqërore apo pasojave të shkaktuara.
Ndryshe, Prokuroria Themelore në Mitrovicë më 30 janar 2020, ka ngritur aktakuzë ndaj Kujtim Bekaj, i cili në pikën e parë të aktakuzës, ngarkohet se prej vitit 2014 deri në vitin 2017, në pozitën e zyrtarit të gjendjes civile, në Komunën e Skenderajt, ka bërë lidhjen e martesave të personave kosovarë me persona me shtetësi të huaj, pa i plotësuar kushtet për lidhjen e martesës, duke mos qenë prezent personat për lidhjen e martesës, dëshmitarët, përkthyesi, pa u vertetuar identiteti i personave, dhe lidhjet e martesave i ka regjistruar në sistemin elektronik të gjendjes civile dhe ka lëshuar certifikata martesore, për 45 raste gjithsej.
Me këto veprime, sipas aktakuzës i akuzuari Bekaj ka kryer veprën penale “Keqpërdorim i pozitës apo autoritetit zyrtar”, nga neni 422, paragrafi 1 të Kodit Penal.
Në pikën e dytë të aktakuzës, Kujtim Bekaj akuzohet se prej vitit 2014 e deri në vitin 2017, në pozitën e zyrtarit të gjendjes civile pranë Komunës së Skenderajt, në dokumente zyrtare ka shënuar të dhëna të rreme për personat për të cilët ka përpiluar lidhje martesore, e më pas me nënshkrimin e tij dhe vulën zyrtare ka vërtetuar dokumentet zyrtare.
Me këto veprime, sipas aktakuzës i akuzuari Bekaj ka kryer veprën penale “Falsifikim i dokumentit zyrtar”, nga neni 434, paragrafi 1 të Kodit Penal./BetimipërDrejtësi
Shënim: Personat e përmendur në këtë artikull konsiderohen të pafajshëm, përveç nëse nga gjykata vërtetohet se janë fajtorë me vendim të formës së prerë.
