Anëtari i Lëvizjes Vetëvendosje në KQZ, Sami Kurteshi, të mërkurën ka eskaluar me gjuhën e tij drejtuar mediave dhe gazetarëve.
Specifikisht gazetares të Nacionales Besarta Hoti, ai iu referua se punon për “vrasës me pagesë”.
Ish-Avokati i Popullit, përdori një gjuhë ekstreme edhe ndaj Asociaiconit të Gazetarëve të Kosovës, të cilët i quajti “Aleancës e Grupeve Kriminale”. Kjo sjellje e Kurteshit, shkaktoi reagime të shumta, duke e dënuar gjuhën e tij.
Madje në disa reagime u kërkua nga presidentja Vjosa Osmani, që ai të largohet nga pozita e anëtarit të KQZ-së.
Bekim Kupina, këshilltar për media nga zyra e presidentes Vjosa Osmani ka thënë se deri tani nuk është adresuar asjnë propozim nga Komisioni Qendror i Zgjedhjeve për shkarkimin e Kurteshit.
“Zyra e Presidentes së Republikës së Kosovës, sqaron se Ligjit i ri nr. 08L-228 për Zgjedhjet e Përgjithshme në Republikën e Kosovës, i cili është votuar nga të gjitha partitë politike në Kuvend, ka hyrë në fuqi më 3 korrik 2023”.
“Ky ligj ka kufizuar kompetencat e Presidentes sa i përket përfundimit të mandatit të anëtarëve të KQZ-së, në situata kur argumentohet se është dëmtuar statusi dhe integriteti i KQZ-së, meqë për dallim nga ligji i kaluar, ligji aktual parasheh se Presidentja mund ta shkarkoj një anëtar të KQZ-së, për veprimet që ndërlidhen me statusin dhe integritetin e KQZ-së vetëm pasi të pranohet propozimi me shkrim nga KQZ-ja, propozim ky i cili duhet miratuar paraprakisht në KQZ, me shumicë prej dy të tretave (2/3) të anëtarëve. Deri më tani, një propozim i tillë nuk është adresuar nga ana e KQZ-së në Presidencë”, ka thënë Kupina.
Ndër tjera, Kupina ka shtuar se anëtarët e KQZ-së, përgjatë gjithë procesit zgjedhor dhe në çdo situatë që ndërlidhet me të, duhet ta respektojnë betimin që japin kur dekretohen në këtë institucion.
Klan Kosova ditë më parë ka mësuar se Prokuroria tashmë ka autorizuar Policinë për ta intervistuar Sami Kurteshin.
