Maqedonia e Veriut është tronditur nga një ngjarje e rëndë, ku si pasojë e një zjarri që ka shpërthyer në diskotekën “Plus” në Koçan, 59 persona kanë humbur jetën dhe mbi 155 të tjerë kanë mbetur të lënduar.
Zjarri dyshohet se shpërtheu si pasojë e mjeteve piroteknike, të cilat u lëshuan gjatë kohës që po performonte grupi i njohur DNA.
Në lidhje me këtë ngjarje tragjike, tashmë është arrestuar edhe pronari i klubit të natës ku ka shpërthyer zjarri.
Të rinjtë humbën jetën teksa po argëtoheshin me muzikë live, ndërkaq nga videot e siguruara nga momenti i shpërthimit, vërehet se si zjarri ka shpërthyer në pjesën e sipërme të platosë, ku po digjeshin disa fishekzjarre.
Mbi 100 personat e lënduar janë duke u trajtuar në spitalet e Koçanit, Shtipit e Shkupit, ndërsa sipas ministrit të Shëndetësisë, Arben Taravari, 18 prej tyre janë në gjendje kritike.
Drejtoresha e Spitalit të Koçanit, Kristina Serafimova, më herët ka bërë të ditur në këtë spital po trajtohen rreth 20 pacientë me lëndime më të lehta, ndërsa të lënduarit që janë në gjendje më të rëndë janë dërguar në Klinikat e Shtipit dhe Shkupit.
Në një deklaratë të dhënë para mediave, ajo ka thënë se një numër i madh i viktimave kishin ndërruar jetë në vendngjarje, e disa prej tyre sapo kishin mbërritur në spital.
Sipas drejtoreshës së spitalit të Koçanit, personat e vdekur janë nga mosha 14-24 vjeçare.
I lënduar rënë nga ky incident tragjik ka mbetur edhe këngëtari i grupit DNA që po performonte në skenë, Vlladimir Blazev-Panço, i cili ka pësuar djegie në fytyrë dhe dorë dhe ndodhet në mbështetje të oksigjenit.
Sipas informacioneve zyrtare në koncert morën pjesë rreth 1500 persona, pas së cilës ndodhi një rrëmujë për daljet.
E shumë familjarë nuk kanë akoma informacion për fatin e njerëzve të tyre të afërt.
Në rrjetet sociale janë shfaqur disa fotografi të personave që ishin të pranishëm në diskotekën “Puls”, duke kërkuar informacione për më të afërmit e tyre.
Fotografitë e tyre, së bashku me emrat dhe numrat e telefonit janë shpërndarë, me kërkesën që, nëse dikush e di në cilën spital ndodhen ose ka ndonjë informacion tjetër, të njoftojë në numrat e dhënë.
Ndërkaq, drejtori i Qendrës për Menaxhimin me kriza, Stojçan Angellov, ka deklaruar se po bëhen përgatitjet për transportin e personave të lënduar rëndë në zjarrin në Koçani në spitale të specializuara në disa shtete evropiane.
Ai ka thënë se kanë ardhur oferta për ndihmë nga më shumë shtete.
“Në këtë moment ka mjaftueshëm gjak dhe nuk ka nevojë për aksione shtesë të dhurimit të gjakut për të lënduarit në aksidentin e tmerrshëm në Koçan. Gjithashtu, i kemi të gjitha mjetet materiale të nevojshme dhe nuk kemi nevojë për asnjë lloj donacioni”, ka thënë Angelov.
