Ish-kryeministri dhe deputeti, Avdullah Hoti, ka reaguar pas rezultateve zgjedhore, duke theksuar se rezultati i partisë nuk është i kënaqshëm dhe se është e domosdoshme të reflektohet mbi këtë situatë dhe të ndërrohet lidershipi.
“LDK-ja ka nevojë për një lidership me qasje ekipore, që është gjithëpërfshirës, me orientime të qarta politike të qendrës së djathtë, që mbledh rreth vetes profesionistë dhe e rikthen LDK-në në epiqendrën e profesionistëve më të mirë të Kosovës, ashtu siç ka qenë LDK-ja”, thuhet ndër të tjera në reagimin e sotëm që Hoti e bëri në Facebook.
Mirëpo, Hoti po harron se ka treguar performancë të dobët në zgjedhjet e 9 shkurtit në fshatin e tij, Ratkoc të Rahovecit. LDK-ja ka shënuar një rezultat tejet të dobët, duke dalë partia e tretë me gjithsej 305 vota, ose 21.46%, pas VV-së dhe AAK-së.
Ndërkohë, para disa ditësh, kryetari i LDK-së, Lumir Abdixhiku, ka falënderuar mbi 171 mijë votuesit e partisë që ai drejton. Abdixhiku kishte rikujtuar se katër vjet më parë kishin qenë mbi 110 mijë votues, ndërsa në këto zgjedhje LDK-ja pati një rritje, duke marrë mbi 171 mijë vota, për çka tha se e ka kuptuar qartë mesazhin e votuesve për LDK-në.
Kujtojmë se, sipas rezultateve të shpallura nga Komisioni Qendror i Zgjedhjeve, LDK-ja ka dalë partia e tretë në zgjedhjet e 9 shkurtit, duke siguruar 20 mandate në Kuvendin e Kosovës. /Indeksonline/
