Numri i rasteve të dhunës në familje ka marrë përmasa shqetësuese në vendin tonë. Këto ngjarje bëhen edhe më të rënda, kur viktima janë prindërit të cilët përjetojnë dhunë psikike e fizike nga fëmijët e tyre. Një rast i tmerrshëm ka ndodhur dje në fshatin Softaj të Ferizajt.
I dyshuar është një 30-vjeçar, i cili ka ushtruar dhunë ndaj nënës së tij, të cilën e ka sulmuar brutalisht dhe e ka kërcënuar me vrasje pas një mosmarrëveshje momentale.
Sinjali mëson se fillimisht djali ka kërkuar nga nëna e tij që t’ia jepte veturën dhe ajo të shkonte në punë me motoçikletë, por u përball me refuzimin e saj dhe nisi ta sulmojë fizikisht.
Sipas informacioneve të para, në shenjë revolte, i dyshuari e ka goditur disa herë viktimën e më pas e ka përplasur përtokë, ku për pasojë është alivanosur. Për të mos mbaruar me kaq, e ka kërcënuar me thikë e sëpatë se do vrasë.
Por, për fat të mirë, pasi rasti u denoncua, kanë intervenuar njësitë përkatëse. Viktima ka marrë ndihmën e nevojshme mjekësore dhe është jashtë rrezikut për jetë.
Si rezultat i intervenimit të Policisë, djali i dyshuar është arrestuar dhe shoqëruar në stacion policor.
Ndaj tij, Prokurori i Shtetit ka urdhëruar masën e ndalimit policor.
