(Përditësuar, ora 20:26)- Gjykata Themelore në Mitrovicë ka aprovuar kërkesën e Prokurorisë Themelore në Mitrovicë, duke ua caktuar masën e paraburgimit në kohëzgjatje prej 30 ditësh (secilit veç e veç), tetë të dyshuarve që u arrestuan në aksionin e së mërkurës në regjionin e Mitrovicës.
Në vendimin e siguruar nga “Betimi për Drejtësi“, thuhet se tetë të dyshuarit janë: Berat Hasani, Ifran Paca, Orhan Bajrami, Arben Smajli, Tadija Radivojeviq, Alban Beqiri, Shqiptar Sadiku dhe Nuredin Rama.
“Masa e paraburgimit caktohet në kohëzgjatje prej një muaji, 2. Paraburgimi sipas këtij Aktvendimi të pandehurve: Berat Hasanit, Ifran Pacës, Orhan Bajramit, Arben Smajlit, Tadija Radijvojeviq, Alban Beqirit, Shqiptar Sadikut dhe Nuredin Ramës i llogaritet prej datës 19.03.2025 e deri me datën 18.04.2025”, thuhet në vendim.
Tetë të pandehurit dyshohen për “Import, eksport, furnizim, transportim, prodhim, këmbim, ndërmjetësim ose shitje të paautorizuar e armëve apo materialeve plasëse”, kurse Hasani, Paca dhe Bajrami dyshohen edhe për “Detyrim”.
Kundër këtij aktvendimi, palët e pakënaqura kanë të drejtë ankese në Gjykatën e Apelit, përmes Gjykatës Themelore në Mitrovicë.
Kërkohet paraburgim ndaj tetë të arrestuave në aksionin e djeshëm në regjionin e Mitrovicës
Mitrovicë- Prokuroria Themelore në Mitrovicë – Departamenti i Përgjithshëm, ka kërkuar nga Gjykata Themelore në Mitrovicë caktimin e paraburgimit për tetë të arrestuarve të mërkurën (19 mars) në Mitrovicë, në aksionin e realizuar në gjithsej 21 lokacione në regjionin e Mitrovicës.
Sipas Prokurorisë, në atë aksion u sekuestruan 9 armë zjarri, 200 fishekë, municione të ndryshme, 15 telefona mobilë, 2 palë pranga, thikë, tyta të armës, fatrolla për armë dhe 1 DVR, raporton “Betimi për Drejtësi“.
“Për të pandehurit B.H., I.P., dhe O.B., është paraqitur kërkesë për caktimin e paraburgimit për shkak të dyshimit se në bashkëkryerje kanë kryer veprat penale “Detyrimi” nga neni 328 paragrafi 1 e lidhur me nenin 31 të KPRK-së, si dhe “Importi, eksporti, furnizimi, transportimi, prodhimi, këmbimi, ndërmjetësimi ose shitje e paautorizuar e armëve apo material plasëse nga” neni 364 paragrafi 1 lidhur neni 31 të KPRK-së”, thuhet në njoftim.
Pesë të tjerë dyshohen vetëm për një vepër penale.
“Për të pandehurit A.S., T.R., A.B., Sh.S., dhe N.R., është paraqitur kërkesë për caktimin e paraburgimit për shkak të dyshimit se kanë kryer veprën penale ”Importi, eksporti, furnizimi, transportimi, prodhimi, këmbimi, ndërmjetësimi ose shitje e paautorizuar e armëve apo material plasëse” nga neni 364 paragrafi 1 lidhur neni 31 të KPRK-së”, thuhet më tej.
Seanca për caktimin e paraburgimit për tetë të akuzuarit do të mbahet sot.
Ndryshe, në aksionin që u zhvillua të mërkurën në 21 lokacione në disa komuna, 16 persona u shoqëruan në Polici, ku 13 prej tyre u dërguan në mbajtje. Mesin e të arrestuarve ishte edhe një zyrtar policor. /BetimipërDrejtësi
Shënim: Personat e përmendur në këtë artikull konsiderohen të pafajshëm, përveç nëse nga gjykata vërtetohet se janë fajtorë me vendim të formës së prerë.
