Pas raportimeve për keqpërdorimin e 166 mijë eurove në Bashkësinë Islame të Kosovës që thuhet se janë para të vitrave, zeqatit, anëtarësisë dhe qerave të objeteve, ka reaguar avokati i ish arkatarit të BIK-ut në Prishtinë duke hedhur poshtë këto akuza.
Kastriot Feka, avokat mbrojtës i Bahri Rexhës ish arkatar i BIK-ut në Prishtinë që më pas u largua tërësisht nga puna, ka thënë se klienti i tij po akuzohet për keqpërdorim pa asnjë fakt apo provë të vetme, raporton Gazeta Online Veriu.info.
Avokati Feka ka thënë se klienti i tij është larguar nga puna jashtëligjshëm dhe po dyshohet pa asnjë fakt të vetëm, duke theksuar se të gjitha faturat dhe transaksionet financiare janë kryer me nënshkrimin e kryetarit të BIK-ut në Prishtinë Hetem Sopjani.
Ai ka hedhur dyshime nëse familjarë të krerëve të BIK-ut kanë përfituar nga këto 166 mijë euro.
Tutje, Feka ka thënë se kanë kërkuar takim me myftiun e Kosovës, Naim Tërnava, mirëpo i njëjti nuk i ka pranuar.
“Gjithashtu, u deklarua se kallëzimi penal nga ana e BIK është përpiluar para 2 ose 3 muajve. Si përfaqësues ligjor i z. Rexhaështë me rëndësi të theksoj se kam paraqitur kërkesën për takim me kreun e BIK-ut z. Naim Tërnava dy vite më parë. Për mua mbeten të paqarta arsyet pse kjo kërkesë është heshtur dhe nuk është pranuar”, ka shtuar Feka.
Për këtë, Feka ka ngritur disa pyetje ndaj së cilave, ai thotë se duhet të përgjigjet myftiu Tërnava.
“Z. Tërnava mund të ketë shmangur pyetjet përkohësisht nga opinioni publik, por jo edhe përballë drejtësisë, siç janë:
– A ka pasur mundësi z. Bahri Rexha, në pozitën që ka ushtruar, t’i ndalojë krerët e BIK që të marrin para pa mbulesë nga arka e Bashkësisë Islame të Kosovës?
– Cili është “krimi” që e kryer klienti im, Bahri Rexha, kur nuk ka lejuar keqpërdorimin e buxhetit? (Sqarim: Duke qenë doktor shkencash dhe njohës i mirë i ligjit, ai nuk ka pranuar ta shkelë atë edhe kur kjo është kërkuar prej tij.)
– Nga kjo shumë e të hollave që mungojnë, a kanë përfituar edhe familjarët e krerëve të BIK-ut?!
– Si është e mundur që për të gjitha këto shkelje të kryera nga persona që janë në krye të Bashkësisë Islame të kërkohet përgjegjësi vetëm nga një njeri që ishte hallka e fundit e zinxhirit? Dhe, i cili vetëm ka zbatuar urdhrat nga mbikqyrësit e tij, duke rënë pre edhe e ushtrimit të ndikimit të tyre.
– Kur është bërë auditimi i fundit në BIK, (nëse është bërë ndonjëherë)?
Si dhe pyetja e fundit, por jo më pak e rëndësishme: Pse u amnistua Hetem Sopjani, personi përgjegjës për këto mjete?”, ka shkruar Feka.
Në atë postim, ai ka bashkëngjitur edhe letrën e 8 qershorit 2023, përmes së cilës thotë se i janë drejtuar myftiut Naim Tërnava rreth dyshimeve për keqpërdorimin e fondeve në BIK.
