Asamblisti i Vetëvendosjes në Vushtrri, Mek Selaci, përmes një reagimi publik ka shprehur shqetësimin për dukurinë e shitjes së narkotikëve dhe vendet ku kryhen vepra tjera kriminale, raporton Gazeta Online Veriu.info.
Ai ka thënë se në Vushtrri është një “sekret i hapur” se në cilat pjesë, lagje, lokale dhe skute shiten narkotikët dhe kryhen vepra të tjera kriminale.
Sipas tij është momenti i fundit që policia, e sidomos prokuroria, të merret seriozisht me këto dukuri që tashmë janë bërë një kërcënim i madh për qytetarët dhe, veçanërisht, për të rinjtë.
Postimi i plotë:
A flasim kur thonë: “Kah del shpirti”?
Në Vushtrri është një “sekret i hapur” se në cilat pjesë, lagje, lokale dhe skute shiten narkotikët dhe kryhen vepra të tjera kriminale.
Çfarë është ndërmarrë deri tani?
Asgjë!
Në Vushtrri janë të njohur me emër dhe mbiemër të rinjtë e çdo gjenerate që:
• Merren me shitjen dhe shpërndarjen e narkotikëve.
• Merren me vepra kriminale si kërcënime, haraç dhe veprime të tjera të jashtëligjshme.
• Merren me vjedhje.
• Merren me lojëra fati.
• Merren me “menaxhimin” e prostitutave (valltareve).
Çfarë ndodh?
Në 99% të rasteve, edhe nëse ndodhin arrestime, ata lirohen pas pak orësh për të vazhduar karrierën e tyre kriminale deri në arrestimin-lirimin e radhës.
Është momenti i fundit që policia, e sidomos prokuroria, të merret seriozisht me këto dukuri që tashmë janë bërë një kërcënim i madh për qytetarët dhe, veçanërisht, për të rinjtë tanë.
Nëse nuk do të ketë hapa dhe veprime konkrete, nuk na mbetet gjë tjetër veçse të organizohemi në një “Mbrojtje Qytetare” dhe të fillojmë të mbrohemi vetë, duke luftuar me çdo mjet këta kriminelë.
Mos heshtni, mjaftë më!
Sinqerisht e me mllef,
Mek Selaci
