Komunikimet e brendshme të Lidhjes Demokratike të Kosovës mes anëtarëve të Kryesisë së kësaj partie, ku flitet për një “skemë të organizuar kriminale” lidhur me votat me postë të mërgatës, kanë nxitur reagime të shumta.
Në komunikimet e publikuara të hënën, janë mesazhet e Kujtim Shalës, Arben Gashit, Armend Zemajt dhe Avdullah Hotit. Gashi në këtë komunikim këmbëngulte se ka pasur vjedhje të votave dhe insistonte që skemës, që sipas tij u orkestrua nga disa bashkëpartiakë, t’i vihet emri “skemë kriminale”.
Vetë kreu i partisë, Lumir Abdixhiku reagoi disa orë pas publikimit të komunikimeve, duke i cilësuar ato si “sulmet e sinkronizuara ndaj LDK-së”.
“Në këto sulme të paramenduara e në sinkron, janë bërë bashkë kundërshtarët e rinj e të vjetër të Lidhjes; dhe gjithë ata që ndjejnë se kanë humbur hapin me hapjen e madhe që në LDK ka ndodhë, po ndodhë dhe do të ndodhë”, ka shkruar ai.
Abdixhiku tutje ka deklaruar se këto janë tema të brendshme, për të cilat ka thënë se janë diskutuar tashmë në Kryesi.
“LDK i beson institucioneve tona në çdo drejtim; dhe në këtë drejtim. Ne nuk bëjmë as prokurorinë e as gjyqësinë. LDK i ka besuar institucioneve tona edhe kur ka fituar në tri nivele betejën e tentim anulimit të votave tona me partinë në pushtet. Tri fitore në tri nivele – sepse vota jonë është e shenjtë dhe e drejtë! Prandaj dhe fitorja ligjore. Nga opozita, nga vendi i tretë, nga pozicioni i sulmuar nga të giithë përnjëherë! E drejta megjithatë triumfon!”, ka shkruar Abdixhiku.
Sipas tij, kështu po tentohet të nënshtrohet LDK-ja.
Me gjuhë pak a shumë të njëjtë reaguan edhe eksponentë të tjerë të LDK-së, ndërkohë që nuk ka pasur asnjë reagim nga Kujtim Shala, Arben Gashi, Avdullah Hoti apo Armend Zemaj.
Anëtari i Kryesisë së Lidhjes Demokratike të Kosovës, Berat Rukiqi, e ka cilësuar këtë si “shantazh për nënshtrim dhe bërje numrash për të tjerët”.
Ka qenë edhe Paris Guri, ai që ka bërë një reagim të shkurtë për këto biseda, ku në profilin e tij ka shkruar “LDK nuk shantazhohet”.
Reagime të shumta pati edhe nga VV-ja.
Ministrja e Drejtësisë, Albulena Haxhiu, ka thënë se Prokuroria duhet të veprojë me urgjencë dhe të zgjerojë hetimet edhe ndaj anëtarëve të Kryesisë së Lidhjes Demokratike të Kosovës, lidhur me votat me postë të mërgatës.
“PZAP dhe Gjykata Supreme e kanë pasur për detyrë ruajtjen e vullnetin të qytetarëve, megjithatë, ndonëse ishin të vetëdijshëm për skemën kriminale përmes votave me postë, ata refuzuan qëllimisht të kryenin detyrat e tyre. Ata mbyllën sytë përballë këtij krimi.
Prokuroria duhet të veprojë me urgjencë dhe të zgjerojë hetimet edhe ndaj anëtarëve të Kryesisë së LDK-së dhe ndaj ekipit të përfshirë në këtë skemë kriminale dhe të sjellë para drejtësisë çdo person të përfshirë në këtë krim. Vullneti i qytetarëve duhet të mbrohet me çdo çmim!”, shkroi ajo.
Një reagim e pari edhe deputetja e zgjedhur, Shqipe Mehmeti Selimi. Ajo ka shpërndarë screenshot’at e këtyre komunikimeve të publikuara nga Reporteri.net, teksa është marrë me Kryetarin e LDK’së, Lumir Abdixhikun dhe nënkryetaren Doarsa Kica-Xhelili, për të cilët ka thënë se duhet të dorëhiqen dhe vetëdorëzohen në Polici.
Ajo ka thënë se dyshimet e forta për vjedhjen dhe manipulimin e votave të mërgatës nga ana e LDK-së janë një goditje e rëndë për demokracinë dhe vullnetin e qytetarëve.
“Si për habi Lumiri dhe Doarsa (projektuesit e manipulimit) po heshtin për këto akuza… Për këta dy, dorëheqja dhe vetëdorzimi në polici është e pakta që duhet bërë. Institucionet përgjegjëse duhet të veprojnë menjëherë për të hetuar këto pretendime dhe për të ndëshkuar fajtorët. Vota është e shenjtë dhe askush nuk guxon ta prekë apo ta manipulojë atë”, ka shkruar Mehmeti-Selimi.
Edhe deputeti i zgjedhur i Lëvizjes Vetëvendosje, Mefail Bajqinovci, ka thënë se bisedat e brendshme në grupin e Lidhjes Demokratike të Kosovës, të publikuara sot nga Gazeta Online Reporteri.net, tregojnë “një realitet të keqpërdorimeve të LDK’së”.
Ai ka thënë se akuzat e ngritura nga anëtarët e Kryesisë së kësaj partie të hetohen menjëherë nga institucionet e drejtësisë dhe që përgjegjësit të përballen me ligjin.
“Kosova meriton transparencë, drejtësi dhe zgjedhje të lira – jo manipulime”, ka shkruar Bajqinovci, teksa ka ndarë edhe screenshot’a të këtyre bisedave.
Gazeta online Reporteri.net të hënën publikoi komunikimet e brendshme të anëtarëve të kryesisë qendrore të LDK-së, më 2 mars 2025, këtë herë në grupin në “Viber” ku pjesë e tij është edhe kryetari Lumir Abdixhiku.
Ish-shefi i grupit parlamentar të LDK-së, Arben Gashi, në këtë komunikim po këmbëngulte se ka pasur vjedhje të votave dhe insistonte që skemës, që sipas tij u orkestrua nga disa bashkëpartiakë, t’i vihet emri “skemë kriminale”.
“Faktet po ulërasin o Kujtim. Ti duhet me u pajtu me shqetësimin, për krimin qe ka ndodhë”, shkruante Arben Gashi në grupin në “Viber” të kryesisë qendrore të LDK-së.
“Asnjë manipulim nuk është i tolerueshëm”, i përgjigjej Kujtim Shala. “Për të gjitha”, vazhdonte numri 2 i listës zgjedhore të LDK-së.
“Kujtim, qitja emrin, nuk është manipulim, është skemë e organizuar kriminale. Pa e identifiku sakt problemin nuk mundemi me e shpëtu partinë”, insistonte Arben Gashi në mesazhin në grupin në Viber të kryesisë së LDK-së, të cilin e ka siguruar gazeta online Reporteri.net.
“Ok dajë, e identifikojmë dhe e adresojmë si duhet. Jemi ne, por kemi edhe institucione që merren me gjëra të tilla”, reagoi sërish Shala.
Me “Ok.”e mbyll diskutimin më të Arben Gashi.
“Skemë kriminale”, gjendjen me votat me postë brenda listës zgjedhore të LDK-së e kishte emërtuar edhe anëtari tjetër i kryesisë Shkëmb Manaj. Një mesazh të tij që akuzonte partinë për vjedhje të votave, të cilin Manaj e kishte dërguar në grupin e brendshëm të Kryesisë në “WhatsApp” e ka nxjerrë në publik gazeta online Reporteri.net, të premten e javës që shkoi./Reporteri.net/
