Anëtari i Nismës Socialdemokrate, Fatmir Matoshi, ka thënë se për të do të ishte nder nëse kreu i NISMA-s, Fatmir Limaj, do të zgjidhej kryetari i Kuvendit të Kosovës.
Matoshi ka mohuar se kanë pasur takime me drejtuesit e Lëvizjes Vetëvendosje dhe se NISMA do ta votonte Qeverinë pa arritur një marrëveshje.
Sipas Matoshit, NISMA do të preferonte një Qeveri të opozitës, por nuk ka përjashtuar mundësinë për t’u bashkuar me LVV-në.
“Pa një marrëveshje me u fut në një qeveri nuk ka asnjë kuptim. Nuk është logjikë kjo që ne me ia dhënë LVV-së atë që nuk ia ka dhënë populli – me e bo e vetme qeverinë. Është e natyrshme që subjektet politike arrijnë një marrëveshje për bashkë-qeverisje dhe bashkojnë votat në kuvend por një subjekt me votu një subjekt tjetër nuk është normale”, ka thënë Matoshi në DebatPlus.
I pyetur nëse Fatmir Limaj ka rënë dakord për ta votuar Qeverinë me LVV-në nëse i premtohet pozita e kryekuvendarit, Matoshi ka thënë se një marrëveshje e tillë nuk është diskutuar dhe se ai nuk ka informacione për këtë gjë.
Megjithatë, sipas tij një veprim i tillë do të ishte nder.
“Deri më sot nuk ka pasur takim. Nuk e kemi diskutuar, mirëpo për mua do të ishte nder nëse do ta drejtonte Fatmir Limaj”, ka thënë ai.
