Sekretarin i Shtetit për Punë të Jashtme i Mbretërisë së Bashkuar, David Lammy, kërkoi që qeveria e re e Kosovës të formohet shpejt, ndërsa tha se kjo “është esenciale në këto momente sfiduese”.
Ai tha pas takimit me presidenten Vjosa Osmani se Mbretëria e Bashkuar është “mik dhe partner kyç” i Kosovës, ndërsa shtoi se “janë disa gjëra që duam t’i shohim me rastin e zhvillimit të këtij partneriteti”.
“Duam normalizim të qëndrueshëm dhe paqësor për ju këtu në Kosovë, mes Kosovës dhe Serbisë”, tha ai.
Lammy e përmendi dialogun Kosovë-Serbi si një çështje në të cilën tha se qeveria e ardhshme duhet të angazhohet fuqishëm.
“Shpresoj që qeveria e ardhshme do t’i adresojë nevojat e të gjithë qytetarëve, duke përfshirë progresin në integrimin e serbëve të Kosovës dhe angazhimin e fuqishëm në dialogun e udhëhequr nga Bashkimi Europian”, tha ai.
Kryediplomati britanik tha se para dy javësh e ka takuar shefen e diplomacisë së Bashkimit Europian, Kaja Kallas në Londër dhe se me të kanë diskutuar edhe për nismat e saj dhe për Kosovën.
“Pres që të punojmë me kolegët europianë përsëri në këtë kohë të sfidave dhe ta luajmë rolin tonë të plotë përkrah Bashkimit Europian për t’u siguruar që të kemi dialog, por edhe të kemi progres që funksionon për njerëzit e për popullin e Kosovës dhe të Serbisë”, tha ai.
Ai tha se është e rëndësishme që ta shohin Kosovën të shënojë progres në integrimin euroatlantik.
“Me mbështetjen e Mbretërisë së Bashkuar shpresojmë që do të mund të anëtarësoheni në Këshillin e Europës”, tha Lammy.
Ai përmendi edhe faktin se Mbretëria e Bashkuar do ta udhëheqë Procesin e Berlinit këtë vit “në një kohë mjaft të vështirë”, por edhe kontributin e forcave britanike në misionin e KFOR-it, për të cilin tha se është “qenësor për sigurinë” e vendit.
Lammy tha se Kosova ka shënuar “progres të jashtëzakonshëm” pasi e përmendi rolin e partisë së tij dhe të ish-kryeministrit britanik Tony Blair në çlirimin e vendit.
“Lidershipi i tij rreth ndërhyrjes së NATO-s ka qenë një prej arritjeve të tij më të mëdha”, tha ai.
