Kryeministri në detyrë, Albin Kurti, ka marr sot pjesë në ceremoninë e ndarjes së titullit ‘’Doctor Honoris Causa” për Vincenzo Paglia, për të cilin i pari i qeverisë ka thënë se ishte imzot Pagalia ai që i ka kushtuar vëmendje Kosovës në një periudhë që kjo e fundit nuk e gëzonte aq vëmendjen e botës.
Kurti ka theksuar edhe se, ka qenë Imzoti Paglia ai që e kishte caktuar takimin e parë të presidentit Ibrahim Rugova me Papën Gjon Pali II në mars të vitit 1993, takim i cili, siç ka deklaruar kryeministri, e ka kthyer një faqe në historinë në vendin tonë, në mënyrë esenciale.
“Përmes traditës së tij të krishterë, miku ynë më i dashur, Vincenzo Paglia, ia përkushtoi shumë dekada miqësie popullit dhe vendit tonë’’, ka thënë ai mes tjerash.
Po ashtu, Kurti ka deklaruar edhe se Pagalia me integritetin dhe zellin e tij e ka që një miqësi e vërtetë është një lloj dashurie, që nuk i përgjigjet vlerës paraprake të objektit të vet.
Komunikata:
Kryeministri Kurti mori pjesë në ceremoninë e ndarjes së titullit ”Doctor Honoris Causa” për S.E.R. Mons. Vincenzo Paglia nga Universiteti “Haxhi Zeka”
Pejë, 2 prill 2025
Kryeministri i Republikës së Kosovës, Albin Kurti, sot mori pjesë në ceremoninë e ndarjes së titullit “Doctor Honoris Causa” për S.E.R. Mons. Vincenzo Paglia nga Universiteti “Haxhi Zeka”, në shenjë vlerësimi për kontributin e tij në promovimin e arsimit, të drejtave të njeriut dhe dialogut ndërfetar.
Të mbledhur për të nderuar imzotin Vincenzo Paglia, mikun e madh të kombit tonë, kryeministri Kurti kujtoi periudhën kur ai hidhte dritë mbi Kosovën dhe ngjarjet e dhimbshme në vitet e ’90-ta, kur vendi i nënshtrohej dhunës sistematike nga ana e Serbisë.
“Asokohe, kur pjesa tjetër e botës nuk po i kushtonte shumë vëmendje Kosovës, imzoti Paglia e solli atë në vëmendjen e Papës. Imzoti Paglia kishte caktuar takimin e parë të presidentit të atëhershëm, Ibrahim Rugova, për t’u takuar në mars të vitit 1993 me Papën Gjon Pali II. Ky takim, në mënyrë esenciale, ktheu një faqe në historinë e vendit tonë”, tha kryeministri.
Ndërkaq, imzoti Paglia ka lehtësuar edhe takimin e kryeministrit Kurti me Papën Françesku më 22 qershor të vitit 2023, të cilin e vlerësoi të jetë një nga takimet më mbresëlënëse të karrierës së tij politike e institucionale.
Në anën tjetër, kryeministri nënvizoi faktin që Imzoti Paglia u angazhua pa rezervë për mbrojtjen e së drejtës për shkollim të fëmijëve shqiptarë, pikërisht në kohën kur kulmoi gjenocidi në Kosovë nga ana e forcave serbe.
“Përmes traditës së tij të krishterë, miku ynë më i dashur, Vincenzo Paglia, ia përkushtoi shumë dekada miqësie popullit dhe vendit tonë. Me integritetin dhe zellin e tij, ai na ka dëshmuar të gjithë neve, që një miqësi e vërtetë është një lloj dashurie, që nuk i përgjigjet vlerës paraprake të objektit të vet. Njëkohësisht, në vend të kësaj, ajo përfshin gjithë vlerën në objektin e vet, ashtu si ajo lloj dashurie, që Zoti ka për ne njerëzit dhe për rrjedhojë, dashuria jonë për Zotin dhe dashuria jonë për njerëzimin në përgjithësi.” përfundoi kryeministri fjalën e tij.
Fjala e plotë e kryeministrit Kurti:
E nderuara Ministre e Arsimit, Shkencës, Teknologjisë dhe Inovacionit, znj. Arbërie Nagavci,
I nderuari Rektor i Universitetit “Haxhi Zeka” në Pejë, z. Armand Krasniqi,
I nderuari z. Taulant Kelmedi, zëvendësministër në Ministrinë e Arsimit, Shkencës, Teknologjisë dhe Inovacionit,
I nderuari Arqipeshkv, Monsinjor Vincenzo Paglia,
I nderuari Ipeshkv, Dodë Gjergji,
Të nderuar profesorë e studentë, të pranishëm të tjerë,
Zonja dhe zotërinj,
Sot jemi mbledhur për të nderuar imzotin Vincenzo Paglia, mik i kombit tonë. Kur flasim për miqësi apo për një mik të çmuar, na shkon mendja te modeli i Zotit për miqësi, sipas të cilit do t’i shërbenim njëri-tjetrit duke e ngritur njëri-tjetrin (Testamenti i Ri, Selanikasit te Libri i Parë, Kapitulli i 5-të, vargu i 11-të.) Miqësi e vërtetë do të thotë t’i përkrahim miqtë tanë duke iu dhuruar atyre kohën tonë, duke vërejtur nga larg shqetësimet e tyre, duke dëgjuar nga afër dhe duke zgjatur pra një dorë ndihmese në vetëmohim dhe duke ndërmjetësuar për njëri-tjetrin. Me fjalë të tjera, zgjasim sytë, zemrën dhe qenien tonë në tërësi.
Në vitet e ’90-ta, Kosova i nënshtrohej dhunës sistematike nga ana e Serbisë: shkollat u mbyllën për nxënësit shqiptarë, prindërit u shkarkuan nga puna dhe Serbia dënonte me burgim dhe vdekje të shprehurit e kulturës së shqiptarëve të Kosovës. Në vitet e ’90-ta, kur jeta nuk i ngjante kuptimit të mirëfilltë dhe vlerat shoqërore nuk pasqyronin llogaridhënien, që të gjithë e synojmë, imzoti Vincenzo Paglia, brenda mureve të qytetit të shenjtë të Vatikanit, hidhte dritë mbi Kosovën dhe këto ngjarje të dhimbshme.
Asokohe, kur pjesa tjetër e botës nuk po i kushtonte shumë vëmendje Kosovës, imzoti Paglia e solli atë në vëmendjen e Papës. Imzoti Paglia kishte caktuar takimin e parë të presidentit të atëhershëm, Ibrahim Rugova, për t’u takuar në mars të vitit 1993 me Papën Gjon Pali II. Ky takim, në mënyrë esenciale, ktheu një faqe në historinë e vendit tonë.
Takimi i tyre e solli Kosovën dhe betejat e kohës në vëmendjen e botës, sidomos disa partnerëve diplomatikë, të cilët kishin dyshim për qëndrimin e Kosovës dhe kërkesën e popullit tonë për demokraci dhe liri nga dhuna sistematike e regjimit serb.
Edhe në kohët më të vështira për popullin tonë, në të ’90-tat e apartheidit që kulmuan në gjenocid, ai u angazhua pa rezervë për mbrojtjen e së drejtës për shkollim të fëmijëve shqiptarë.
Nëse lëvizim përpara në një epokë të re të Kosovës, imzoti Paglia ka lehtësuar edhe takimin tim me Papën Françesku, më 22 qershor 2023 në Vatikan, gjë që ka dalë të jetë një prej takimeve më mbresëlënëse në përvojën e karrierën time politike e institucionale.
Për më tepër, imzoti Paglia vazhdon përkushtimin dhe angazhimin e tij ndaj njërës prej çështjeve më delikate lidhur me Kishën Ortodokse Serbe në Kosovë. Duke inkurajuar dialogun e sinqertë dhe, më e rëndësishme, depolitizimin e veprimtarive të përditshme të Kishës Ortodokse Serbe, për të lejuar që֝ të gjithë qytetarët e Kosovës pa dallim, të lulëzojnë në qetësi dhe paqe.
Përmes traditës së tij të krishterë, miku ynë më i dashur, Vincenzo Paglia, ia përkushtoi shumë dekada miqësie popullit dhe vendit tonë. Me integritetin dhe zellin e tij, ai na ka dëshmuar të gjithë neve, që një miqësi e vërtetë është një lloj dashurie, që nuk i përgjigjet vlerës paraprake të objektit të vet. Njëkohësisht, në vend të kësaj, ajo përfshin gjithë vlerën në objektin e vet, ashtu si ajo lloj dashurie, që Zoti ka për ne njerëzit dhe për rrjedhojë, dashuria jonë për Zotin dhe dashuria jonë për njerëzimin në përgjithësi.
Përgëzime e urime për Monsinjor Paglian dhe për Universitetin “Haxhi Zeka” këtu në Pejë, që ia jep një vlerësim kaq të lartë një miku kaq të çmuar!
