Ish-deputetja e Lëvizjes Vetëvendosje i ka propozuar partisë që të nominojë për kryeministër Glauk Konjufcën, numrin dy të Lëvizjes Vetëvendosje dhe ish-kryetarin e Kuvendit të Kosovës.
Aida Dërguti tha sot në një adresim në rrjetin social Facebook se Konjufca do të ishte kandidati ideal për kryeministër në rrethanat aktuale gjeopolitike.
“Në rrethanat e reja gjeopolitike, Kosova ka nevojë për qeveri të re e me legjitimitet. Rrugëdalje mund të jetë së pari mandatimi i të dytit nga partia e parë, i cili është i votuar nga qytetarët (që në këtë rast është Glauk Konjufca) dhe ka aftësi negociuese për të krijuar shumicën, së pari me partitë shqiptare. Kosova nuk ka kohë për të humbur dhe nuk ka nevojë për qeveri teknike. Kohërat e vështira janë test për lidershipin e secilit”, tha Dërguti.
Dërguti e kritikoi kryeministrin në detyrë Albin Kurti, duke thënë se i ka nisur mbrapsht negociatat për formimin e qeverisë së re.
Sipas saj, Kurti është dashur të takohej fillimisht me partitë shqiptare e jo me deputetët e pakicave.
