Deputeti i zgjedhur Albert Kinolli dhe kryetari i Partisë Rome të Bashkuar e Kosovës tha se do të japë kontributin e tij në formimin e institucioneve të Kosovës pas zgjedhjeve të 9 shkurtit.
Ai sot zhvilloi një takim me kryeministrin në detyrë, Albin Kurti, i cili nisi takimet me partitë e komunitetit joshumicë për të marrë përkrahjen e tyre për votimin e qeverisë.
Kinolli u shpreh pothuajse i sigurt që vota e tij do të jetë për Kurtin për formimin e qeverisë pas konstituimit të Kuvendit.
“Kemi pasë një takim konstruktiv me Kurtin për të qenë pjesë e qeverisë së ardhshme. Ne si subjekt politik rom, si Partia e Rome e Bashkuar e Kosovës, tradicionalisht jemi munduar që të jemi sa më konstruktivë dhe kreativë, do të japim kontributin tonë për formimin e qeverisë së re, për të cilën qytetarët e Kosovës kanë mjaft nevojë për shkak se ky proces u stërzgjat. Mendoj që tash jemi drejt një përfundimi të mirë”.
Ai tha se s’kanë vija të kuqe për partitë, por tha se meqë Vetëvendosje është fituesja e zgjedhjeve, ai ia ka bërë disa kërkesa Kurtit në këmbim të votës.
“Nuk kemi vija të kuqe për asnjë subjekt politik dhe duke respektuar rezultatin zgjedhor dhe duke pasë parasysh që Lëvizja Vetëvendosje është fituese e zgjedhjeve, kështu që ne kemi parashtruar kërkesat tona dhe njëra prej tyre kryesore ka qenë që meqë ne jemi të përfaqësuar në Kuvendin e Kosovës me një deputet që të jemi të barabartë dhe të trajtohemi në mënyrë të denjë me të gjitha subjektet politike që janë me një vijë me ne”.
“Po presim 15 prillin, besojmë që kryeministri Kurti do t’i ketë numrat e nevojshëm dhe në këtë kontekst edhe ne do të japim maksimumin për formimin e qeverisë dhe shpresoj që të jemi pjesë”.
I pyetur nëse do të votonte një qeveri të opozitës, Kinolli tha se për këtë version s’mund të flasë njëherë për njëherë.
“Në interesin tonë dhe gjithë qytetarëve tonë është që t’i formojnë institucionet sa më parë. Mirëpo, për këtë solucion do të flasim pas 15 prillit”./Express/
