Sot bëhen katër ditë që kur rreshteri i Policisë së Kosovës Muhamed Lika u vra në rrethana ende të paqarta në hyrje të banesës së tij në Kaçanik.
Lika u vra mbrëmjen e 1 prillit në rrugën “Idriz Seferi” me vetëm një plum dhe se personat e dyshuar për vrasjen e tij ende nuk janë kapur nga organet e rendit.
Policia e Kosovës u zotua se ka organizuar një operacione të madh kërkimor për kapjen dhe identifikimin e tyre, por edhe pas katër ditësh ende nuk ka të arrestuar.
Lajmi.net pak më parë ka kontaktuar me zëdhënës të Policisë së Kosovës në Ferizaj për të kuptuar nëse Policia ka hasur në gjurmët e të dyshuarve, por nga aty morëm përgjigje se ende nuk ka të arrestuar dhe se kërkimet po vazhdojnë
“Janë duke vazhduar hetimet, nuk ka të arrestuar”, tha zëdhënësi i Policisë për rajonin e Ferizajt, Kanun Veseli.
Kryeprokurori i Prokurorisë Themelore në Ferizaj, Burim Çerkini një ditë pas vrasjes së policit Muhamed Lika ka dhënë detaje për media.
Sipas tij, dy të dyshuarit janë larguar në këmbë nga vendi i ngjarjes dhe deri më tani nuk ka informacione që viktima kishte pasur ndonjë problem me dikë.
Në një konferencë për media, Çerkini tha se bazuar në provat e mbledhura, autorët e dyshuar janë parë duke u larguar nga banesa ku ndodhi vrasja.
“Nga ajo që shihet deri më tani, ata kanë ikur në këmbë. Nuk kemi të dhëna që kanë shfrytëzuar ndonjë veturë apo ndonjë mjet tjetër për t’u larguar nga vendi i ngjarjes”, tha ai.
Madje ai shtoi se në vitin 2021, lokalit të tij i ishte vënë flaka.
Për këtë rast tragjik, reagoi edhe ministri i Punëve të Brendshme, Xhelal Sveçla, i cili u bëri thirrje dorasëve të dorëzohen në Polici, pasi i gjithë aparati shtetëror është i mobilizuar të zbulojë të dyshuarit.
“Sulmi ndaj çdo pjesëtari të Policisë së Kosovës është sulm i drejtpërdrejtë ndaj ndaj rendit, institucioneve dhe sigurisë së Republikës së Kosovës”, ka shkruar ai.
“Ftoj dorasin apo dorasit që sa më parë të dorëzohen në organet e rendit, meqë i gjithë aparati shtetëror pa hezitim dhe pa kursim është i mobilizuar të zbulojë dhe arrestojë të gjithë ata që janë përfshirë në këtë vrasje”, vazhdon reagimi i tij.
Familja ka njoftuar se Muhamed Lika është varrosur me 2 prill pas namazit të ikindisë, në fshatin Shtrazë të komunës së Kaçanikut.
Hetimet po vazhdojnë ende, ndërsa Prokuroria po punon për të zbardhur motivin dhe për të sjellë para drejtësisë përgjegjësit e kësaj vrasjeje tronditëse.
